मातृभूमि खेलमैदान विस्तारको लागि महायज्ञमा जग्गा दान गर्नेहरु बढ्दै

•कृष्णबन्धु अर्याल

१८ साउन, स्याङ्जा । पुतलीबजार नगरपालिका वडा १३ स्थित मातृभूमि खेलमैदान विस्तारको लागि स्थानीय दाताहरुले जग्गा दान गरेका छन् । जिल्लाकै पुरानो खेलमैदान विस्तार गर्नको लागि स्थानीय स्मृति क्लबको आयोजनामा सञ्चालित महायज्ञमा जग्गा दान गरिएको हो। विदुषी सुधादेवी, अच्युत प्रियाजी र राम प्रपन्नचार्य (ऋषि गुरु) प्रमुख वाचक तथा उमेश पण्डित उपवाचक रहेका महायज्ञमा खेलमैदानको लागि जग्गा दान गर्नेहरू बढ्दै गएका छन्।

महायज्ञमा अहिलेसम्म आश्विन कुमार अर्याल, श्रीकृष्ण अर्याल, खेमराज अर्याल र नन्द कुमारी अर्यालले खेलमैदानको लागि जग्गा प्रदान गरिसकेका छन् ।  आँधीखोलाको किनारमा भएकोले वर्षेनी कटान हुँदै आएको मैदान साँघुरिदै गहिरहेकोमा विस्तारको लागि जग्गा प्रदान गरिएको दाता दीपक अर्याल बताउँछन् । महायज्ञमा अझै नगदको साथै जग्गा प्रदान गर्ने क्रम चलिरहेको जिल्लाकै पुरानो विद्यालय मातृभूमि माविका पूर्व प्रधानाध्यापक आश्विन कुमार अर्यालले बताए ।  

हाम्रै आँगन अगाडि रहेको खेल मैदान हाम्रो गहना हो, यसलाई संरक्षण गर्नु हाम्रो दायित्व पनि हो उनले भने–खेलमैदानको लागि दान गर्ने दाताहरु बढिरहेका छन । मैले पनि यसैसँगै जोडिएको जग्गा प्रदान गर्न पाउँदा गौरव महसुस गरेको छु। अरु हरुले पनि मैदानका लागि जग्गा र नगद दान दिनेमा  उनी विश्वस्त छन् । खेलकुद गर्न सहज होस भन्दै घडेरी योग्य जग्गा महायज्ञमार्फत दान गर्न पाउँदा निकै खुशी  लागेको अर्का छ, खेमराज अर्याल हर्ष प्रकट गर्छन् ।

दाजुभाइ परिवारको नाममा रहेको करिब डेढ रोपनी जग्गा दान गरेको उनले बताए ।  क्लबका अध्यक्ष भीम रानाले खेलमैदान बिस्तार स्तरोन्नती र संरक्षण गर्ने उद्देश्यले महायज्ञ आयोजना गरिएको बताए ।  हामीले यस महत्वपूर्ण  स्थानमा रहेको खेलमैदानलाई स्तरीय र सुविधा सम्पन्न  बनाउन महायज्ञको आयोजना गरेका हौ उनले भने ।  मैदानमा बेला बेलामा फुटबल,क्रिकेट र भलिबल लगायतका खेल संचालन हुँदै आएको छ।

क्लबका सचिव मीनप्रसाद अर्यालले विगतमा यही मैदानमा खेल अभ्यास गरेकाहरू राष्ट्रिय स्तरका खेलाडी बन्न सफल भएको उल्लेख गरे । त्यसैले यसलाई जोगाई राख्न सके यो मैदानबाट भावी पिढीले पनि प्रचुर लाभ लिन सक्नेछन्, उनले भने । श्रावणी,श्रावण स्नान, रुद्राभिषेक (रुद्रीपाठ), सहश्र जलधारा, बेलपत्र अर्पण, शिव महापुराण पाठ पारायण सहित आयोजना गरिएको महायज्ञ  यही साउन २१ गतेसम्म संचालन गरिने भएको छ।