कुनै जिम्मेवारी नदिने गरी एमालेबाट हटाइए मणी थापा

१८ साउन, काठमाडौं । नेकपा एमालेले माओवादी धारका नेता मणी थापालाई हटाएको छ । नेकपा विभाजन हुँदा उनी एमालेमै बसेपछि स्थायी कमिटी सदस्यको जिम्मेवारी दिइएको थियो । अहिले उनलाई  एमालेले पदमुक्त गरेको छ । लामो समयदेखि एमालेमा निष्क्रिय रहेका थापालाई अरु कुनै जिम्मेवारी नदिने गरी हटाइएको छ । 

एमाले प्रचार विभाग प्रमुख राजेन्द्र गौतमका अनुसार थापा पार्टीको कुनै काममा पनि सक्रिय नभएका कारण हटाइएको हो । एमाले र माओवादी बीचको एकतापछि बनेको तत्कालीन नेकपामा उनलाई स्थायी कमिटीको जिम्मेवारी दिइएको थियो । केपी ओलीले गैर सांसदको रूपमा उनलाई मन्त्री समेत बनाएका थिए ।

पछिल्लो समय एमाले अध्यक्ष ओलीको कार्यशैलीमाथि नै उनले प्रश्न उठाउँदै आएका थिए । त्यसपछि अहिले आएर पार्टीले थापालाई सबै जिम्मेवारीबाट हटाएको हो । उनी २०७९ को निर्वाचनदेखि पार्टीमा निष्क्रिय रहँदै आएका थिए । २०८० को साउनमा बसेको सचिवालय बैठकले पार्टीमा निष्क्रिय भएकोबारे सोधपुछ गर्ने निर्णय गरेको थियो । अहिले उक्त ठाउँमा एमालेले अरु मनोनीत गरिसकेको छ ।