पेन्सन पाउ भन्ने आईजीपी राणाको रिटमा कारण देखाऊ आदेश

१८ साउन, काठमाडौं । पूर्व प्रहरी प्रमुख (आईजीपी) ओमविक्रम राणाको रिटमा सर्वोच्च अदालतले कारण देखाउ आदेश जारी गरेको छ । सुडान घोटाला प्रकरणमा दोषी ठहर भएका राणाले दायर गरेको रिटमा कारण देखाऊ आदेश जारी गरेको हो ।  न्यायाधीश विनोद शर्माको एकल इजलासले लिखित जवाफ माग गर्दै उनको पेन्सन रोकिनुको कारण पेस गर्न विपक्षीहरूको नाममा आदेश जारी गरेको छ । 

पेन्सन खाइरहेका राणाको अख्तियार दुरुपयोग अनुसन्धान आयोगको सेवा निवृत्तिभरण व्यवस्थापन कार्यालयलाई पत्र लेखेर रोकिदिएपछि साउन १७ गते उनले सर्वोच्चमा रिट दायर गरेका थिए । सर्वोच्चले २०७४ वैशाख  १७ गते उक्त विवादमा फैसला  सुनाएको थियो । सर्वोच्च अदालतका तत्कालीन प्रधानन्यायाधीश सुशीला कार्की र न्यायाधीश  विश्वम्भरप्रसाद श्रेष्ठको संयुक्त इजलासले फैसला सुनाउँदै राणासहित केही अधिकृतलाई दोषी ठहर गरेको थियो । 

उनीहरूलाई दुई वर्ष कैद गर्ने विशेषको फैसला सदर गरेको थियो । सुरक्षाकर्मीका लागि गुणस्तरहीन सामग्रीका लागि २८ करोड, ८१ लाख, ६१ हजार, ६ सय २९ रुपैयाँ ३० पैसा भुक्तानी दिँदै भ्रष्टाचार गरेको दाबीसहित आयोगले तीन जना पूर्व आइजीपी र ठेकेदारसहित ३६ विरुद्ध विशेष अदालतमा भ्रष्टाचार मुद्दा दायर गरेको थियो ।