यात्रु लिएर पोखरा उडेको बुद्धको जहाज काठमाडौं फर्काएर अवतरण गरियो, यात्रु र जहाज सकुशल

१८ साउन, काठमाडौं । यात्रु बोकेर काठमाडौंबाट पोखराका लागि उडेको बुद्ध एयरको जहाज केही समयपछि काठमाडौंमै फर्काएर अवतरण गरिएको छ । काठमाडौंबाट पोखरा उडेको उडान नं ६५५ कल साइन ९ एन– एएमडी जहाज उडेपछि केही प्राविधिक समस्या देखिएकाले काठमाडौं नै फर्काइएको हो । 

जहाजमा प्राविधिक समस्या देखिएपछि जहाज फर्किएर काठमाडौंमा नै ल्याण्ड गरेको त्रिभुवन अन्तर्राष्ट्रिय विमानस्थलका प्रवक्ता सुभाष झाले नेपालबहसलाई बताए । उडेको केही समयमा नै जहाजमा समस्या देखिएको चालक दलले जानकारी गराएपछि काठमाडौं फर्काउन भनिएको थियो । 

यात्रु र जहाजमा केही क्षति भएको छैन । ४ बजेर ५ मिनेटमा जहाज काठमाडौंमा नै आएर ल्याण्ड गरेको बताइएको छ । पोखरा पुग्न नसक्ने भन्दै चालक दलले जानकारी गराएको थियो । एक साता अघि मात्र सौर्य एयरको जहाज दुर्घटनामा परेको थियो ।