ओलम्पिकमा कठिन वातावरणको सामना गर्दै इजरायल

१८ साउन, पेरिस । इजरायलको ओलम्पिक टोलीले पेरिस खेलका क्रममा ‘कठिन’ वातावरणको सामना गरेको  उनीहरूको प्रतिनिधिमण्डलका प्रमुखले बताएका छन् ।

इजरायलको इतिहासमा सबैभन्दा ठूलो '८८ सदस्यीय' टोलीले बिहीबार जुडोका पिटर पाल्चिक र इनबार लानिरमार्फत पहिलो पदक जितेको छ । बाँकी १० दिनमा थप दुई वा तीन पदक जित्ने आशा रहेको इजरायली ओलम्पिक कमिटीका अध्यक्ष येल अरादले बताए ।

अनलाइनमार्फत् आउने मृत्युको चेतावनी, उत्पीडन, सामाजिक सञ्जालमार्फत चुहावट भएका व्यक्तिगत सूचना वा मानहानी साथै फुटबल खेलको क्रममा देखिएको इजरायलविरोधी जनमतले खेलमा ध्यान केन्द्रित गर्न गाह्रो भइरहेको इजरायली खेलाडीहरूले बताएका छन् ।

अरादले भने, “हामीले हाम्रा खेलाडीलाई विशेष ढङ्गले तयार गरेका छौँ । हामीले उनीहरूलाई दिएको मुख्य सन्देश यो हो कि हामी यहाँ प्रतिस्पर्धा गर्न र इजरायली भावना देखाउन आएका छौँ ।” 

इजरायली सरकारले अनलाइन उत्पीडन र ‘फिसिङ’ आक्रमणको परिष्कृत अभियानका लागि इरान समर्थित समूहलाई आरोप लगाएको छ । “यो साँच्चै कठिन अवस्था हो । सबैलाई थाहा छ हामी अक्टोबर ७  देखि नै शोकमा परेको राष्ट्र हौँ,” इजरायलमा हमासले गरेको आक्रमणमा एक हजार १७० जनाको ज्यान गएको उल्लेख गर्दै अरादले भने। 

गत सप्ताहन्तमा गोलान हाइट्समा हेजबुल्लाहको रकेट आक्रमणले फुटबल खेलिरहेका १२ बालबालिकाको ज्यान लिएको घटनाले पनि टोलीलाई असर गरेको अरादले बताए ।  

“हाम्रा खेलाडीहरूले दुःख र समस्याको सामना गर्नेछन् र आशा र प्रेरणा घर लिएर जानेछन् भन्नेमा म विश्वस्त छु,” उनले भने । गाजामा जारी इजरायलली आक्रमणले पेरिस ओलम्पिकमा विवाद निम्त्याएको हो । 

ओलम्पिक सुरु हुनुअघि नै प्यालेस्टिनी ओलम्पिक कमिटीले ओलम्पिकको धारणा उल्लङ्घन गरेको र ४०० प्यालेस्टिनी खेलाडी र खेलकूद व्यक्तित्वहरूको हत्या गरेकोमा इजरायललाई बहिष्कार गर्न माग गरेको थियो । 

इजरायली टोली वरपरको सुरक्षा असाधारण रूपमा कडा गरिएको छ । प्यालेस्टिनी उग्रवादी समूह ‘ब्ल्याक सेप्टेम्बर’ले एथलिट गाउँमा इजरायली प्रतिस्पर्धीलाई आक्रमण गरी हत्या गरेपछि सन् १९७२  को खेलदेखि नै इजरायली टोलीहरूलाई कडा सुरक्षामा राखिने गरिएको इजरायलको इतिहासमा पहिलो ओलम्पिक पदक विजेता पूर्व जुडोका अरादले बताए । 

उनले भने, “हामीलाई पेरिसको सुरक्षामा विश्वास छ । अनि मेरो भूमिका यी खेलाडीहरूलाई खेलकूदमा मात्र ध्यान केन्द्रित गर्ने अवसर दिनु हो ।”