अनावश्यक अफवाह फैलाउने काम भयो, स्टन्ट गर्न र पपुलिस्ट बन्न यो समीकरण बनेको हैनः प्रधानमन्त्री

२० साउन, काठमाडौं । नेकपा एमालेका अध्यक्ष एवं प्रधानमन्त्री केपी शर्मा ओलीले पपुलिस्ट बन्न र स्टन्टबाजी गर्न कांग्रेस र एमाले नमिलेको बताएका छन् । उनले कांग्रेस–एमालेको समीकरणले पपुलिस्ट हुनका लागि र स्टन्टबाजीका लागि नभएको उनको भनाइ छ । 

आइतबार च्यासलमा एमालेका पदाधिकारी र केन्द्रीय सदस्यलाई सपथ ग्रहण कार्यक्रममा सम्बोधन गर्दै उनले ओलीले जनता र सुशासनमा केन्द्रित रहेर सरकार अगाडि बढ्ने धारणा राखे । अहिले कांग्रेस र एमालेको समीकरणले संविधान संशोधनको कुरा गर्दा प्रतिगमनको मुद्दा बोकेर हिँडेका पार्टीहरूले भ्रम फिँजाउन सक्रिय बनेकोमा ओलीले गुनासो गरे । 

 उनले अनावश्यक अफवाह नफैलाउन विपक्षी दललाई चेतानवी दिए । संविधान संशोधन लगायतका विषयमा धेरै अफवाह फैलाउने काम भयो । हामीलाई अफवाहको उत्तर दिने, स्टन्ट गर्ने र पपुलिस्ट हुनका लागि जे पायो त्यही कुरा गर्ने फुर्सद छैन । काम गर्न आएको हो यो सरकार । केही उद्देश्य पुरा गर्न र काम पार लगाउन बनेको हो यो समकिरण, ओलीले भने । 

ओलीले अहिले कुनै भुलभुलैयामा, अफवाहको भरमा अन्यौलग्रस्त भएर अथवा पपुलिस्ट हुनका लागि वा स्टन्टबाजीका रुपमा कुनै काम र विचार नगर्ने समेत बताए । ओलीले लोकतन्त्रका लडेका एमाले र कांग्रेसले संविधान संशोधन लोकतन्त्रलाई सुदृढ गर्ने, संविधानको ग्राह्यता, स्वीकार्यता र प्रभावकारी अभिवृद्धि गर्नका लागि समीकरण बनाएको बताए ।  

उनले कतिपयले संविधान संशोधनको विषयमा भ्रम फिँजाउने कोशिश भइरहेको बताए । कतिपयले अहिले पनि हाम्राविरुद्ध भ्रम फैलाउन कोसिस गरिरहेका छन्, हामी संविधान संशोधन गर्न पर्छ भनिरहेका छौं तर धार्मिकग्रन्थ जस्तो असंशोधनीय, विश्वास मात्र गर्नुपर्ने,फेर्न नपर्ने-नपाइने ग्रन्थ जस्तो गरेर संविधानलाई व्याख्या गरिरहेका छन्, ओलीले भने ।  

संविधान जनताको भलाईका लागि, सुशासन र विकासका लागि, आफ्नो मौलिक संस्कृति संरक्षणका लागि, परिमार्जन हुँदै जाने दस्ताबेजलाई पनि भ्रम फिजाई रहेका छन् । उनले जनतासँग एकाकार हुन र कम्युनिष्ट आचरणमा रहन कार्यकर्तालाई निर्देशन दिए । ओलीले पार्टीमा कुनै पनि हिसाबको गुटबन्दी स्वीकार्य नहुने चेतावनी दिए । ओलीले गुटबन्दीका कारण एमाले विभाजन भएको स्मरण गर्दै पार्टीमा गुटबन्दी स्वीकार्य नहुने चेतावनी दिए ।