आचार्य र पुनलाई हटाएर विद्युत् प्राधिकरणको सञ्चालकमा गुरुङ र कार्की नियुक्त

२० साउन, काठमाडौं । सरकारले दुई सञ्चालक हटाएर नेपाल विद्युत् प्राधिकरणको सञ्चालक समितिमा दुई सदस्यलाई नियुक्त दिएको छ । ऊर्जा जलस्रोत तथा सिँचाइ मन्त्रालयले महेन्द्र बहादुर गुरुङ र देवेन्द्र कार्कीलाई प्राधिकरणको सञ्चालकमा नियुक्त गरेको हो ।

सञ्चालकद्वय भक्तबहादुर पुन र कपिल आचार्य पदमुक्त भएसँगै गुरुङ र कार्की नियुक्त भएका हुन् । प्राधिकरण र उद्योगी बीचको विवादमा बक्यौता नउठाइ ६ उद्योगको लाइन पुनः जोड्न नहुने भन्दै पुन र आचार्यले सञ्चालक समिति बैठकमा नोट अफ डिसेन्ट लेखेका थिए । योसँगै स्पष्टीकरण सोधेको मन्त्रालयले चित्त नबुझेको भन्दै पदमुक्त गरेको हो ।  

नवनियुक्त सञ्चालक गुरुङ पञ्चेश्वर विकास प्राधिकरणको पूर्वप्रमुख कार्यकारी हुन् भने कार्की पूर्व ऊर्जा सचिव हुन् । विद्युत लाइन जोड्ने निर्णयको विपक्षमा हस्ताक्षर गरेका कारण प्राधिकरणको सञ्चालक सदस्यबाट आचार्य र पुन हटाइएका हुन् ।