हामी चुप लागेर बस्यौँ भने सरकार निरंकुश हुन्छः कोइराला

२० साउन, काठमाडौं । नेपाली कांग्रेसका वरिष्ठ नेता डा. शेखर कोइरालाले सत्तामा भएका दलका नेता चुप लागेर बस्ने समय नभएको बताएका छन् । उनले सत्ता पक्षका नेता चुप लागेर बसेको खण्डमा यो सरकार निरंकुशतातिर जाने सक्ने भएकाले सरकारलाई सही ठाउँमा राख्न नेताहरु जागरूक  हुनुपर्ने उनको भनाइ छ । 
 
आइतबार पार्टी केन्द्रीय कार्यालय सानेपामा भएको प्रजातन्त्र सेनानी संघको प्रशिक्षण कार्यक्रममा उनले सरकारलाई ठिक बाटोमा हिँडाउन उसका कमजोरी ख्याल गरे देखाइ दिनुपर्ने बताए । कोइरालाले संसदका दुई ठूला राजनीतिक दल एकै ठाउँमा उभिएर सरकार निर्माण गर्दा निरंकुशता जन्मनसक्ने खतरा धेरै हुने बताए ।  

उनले भने, ‘अहिले कहिँकतै यो सरकारमा केही कमजोरीहरू देखियो भने हामीले आवाज बुलन्द गर्नुपर्छ । किनभने दुइवटा ठूला दल सरकारमा छन् । यी दुई वटा ठूला दल एकै ठाउँमा भएपछि निरंकुशता जन्मने पनि त्यतिकै शंका छ । धेरैलाई शंका छ । हामीहरूले आवाज उठाउन सक्यौँ भनेर पक्कै पनि ठिक ट्रयाकमा अघि बढ्छ ।’

उनले अहिले पार्टीका नेताहरू कहिँकतै अल्झिएको जस्तो लाग्ने बताए । कता कता हामीहरू अलमलिएको, अल्झिएको हो कि जस्तो मलाई पनि लाग्छ अब यसरी हुँदैन हामी पार्टीलाई क्रियाशील बनाउन खटिनुपर्छ । पार्टीको महाधिवेशन कसरी समयभित्र सम्पन्न गर्न सकिन्छ भन्नेतिर कांग्रेसका नेता कार्यकर्ता लाग्नुपर्ने उनले बताए । 

०८४ को निर्वाचनमा कुनै दलको वैशाखी लिएर पार्टी सहभागी हुन नहुने उनको भनाइ थियो । नेपाली कांग्रेस र एमालेको सरकारलाई टिकाएर कसरी अघि लग्ने, मजबुत कसरी बनाउने? राजनीतिक स्थायित्व भएन भनेर हामीले यो बनाएको हो । यसले अप्ठेरा परिस्थिति सिर्जना गर्छ । सरकारमा स्थायित्व पनि नहुने, सुशासन पनि दिन नसक्ने, विकास पनि दिन नसक्ने लगायतका कारणले हामीले कांग्रेस र एमालेको सरकार बनाऔँ भनेर सोचेका हौ , यसको निगरानी गर्नुपर्छ, उनले भने ।