काठमाडौंको कालोपुलमा २० वर्षीय युवकको हत्या, पत्नीसहित २ जना पक्राउ

२० साउन, काठमाडौं । काठमाडौंको कालोपुलमा एक युवक मृत भेटिएका छन् । ओखलढुंगाको लिखु गाउँपालिका–९ घर भएका २० वर्षीय प्रेम महत दर्जी मृत भेटिएका हुन् । दर्जीको घाँटीमा सलले कसेर हत्या भएको अवस्थामा शव भेटिएको काठमाडौं प्रहरी परिसर प्रवक्ता नवराज अधिकारीले जानकारी दिए । 

दर्जीको हत्यामा संलग्न भएको आशंकामा दुई जनालाई नियन्त्रणमा लिएर अनुसन्धान अघि बढाइएको अधिकारीले बताए । पक्राउ पर्नेहरूमा मृतक महतका श्रीमती ओखलढुंगाको मानेभन्ज्याङ गाउँपालिका–९ माधवपुर घर भएकी २४ वर्षीया उषा सार्की र सोही ठाउँका २७ वर्षीय मदन रम्तेल छन् ।  मदन, उषाका पूर्वश्रीमान रहेको बुझिएको छ । 

प्रारम्भिक अनुसन्धानको क्रममा महतको हत्या भएको खुलेको हो । शव पोष्टमार्टमका लागि त्रिवि शिक्षण अस्पताल पठाइएको छ । आइतबार बिहान सवा १० बजेतिर महतको शव भेटिएको थियो ।