२३ गते बस्ने कांग्रेस केन्द्रीय समिति बैठकको तयारीबारे देउवा निवास बुढानिलकण्ठमा छलफल

२१ साउन, काठमाडौं । नेपाली कांग्रेसका सभापति शेरबहादुर देउवाले बुढानिलकण्ठ निवासमा पदाधिकारी र पूर्व पदाधिकारीको बैठक बोलाएका छन् । आगामी केन्द्रीय समितिको बैठकका एजेन्डाबारे बिहान छलफल भएको छ । कांग्रेसले आगामी २३ गते केन्द्रीय समिति बैठक बलाएको छ । यसको पूर्वतयारीका विषयमा सभापति देउवाले पदाधिकारी र पूर्वपदाधिकारीसँग छलफल गर्न बैठकमा बोलाएका हुन् । 

बैठकमा केन्द्रीय समिति बैठकमा पेश गर्ने प्रस्तावबारे छलफल भइरहेको सभापति देउवाको सचिवालयले जनाएको छ । यस्तै कोशी प्रदेश सरकारमा कसलाई मन्त्री पठाउने भन्ने विषयमा पनि छलफल भएको छ । प्रदेशमै व्यवस्थापन गर्न नसकेपछि कांग्रेस संसदीय दलका नेता उद्धव थापा काठमाडौँ आएका छन् । कोशीमा कांग्रेस एमालेबीच भएको सहमतिअनुसार कांग्रेसले चारवटा मन्त्रालय पाउने भएको छ । 

चार मन्त्रालयमध्ये कांग्रेस पार्टी सभापति शेरबहादुर देउवा समूहबाट दुई जना, शेखर कोइराला समूहबाट १ जना र नेता कृष्णप्रसाद सिटौला गुटबाट एक जनालाई मन्त्री बनाउने तयारी छ । यसमा शेखर कोइराला समूहले आफ्नो समूहबाट मन्त्री बन्ने आकांक्षी धेरै भएको भन्दै न्यूनतम् २ जना मन्त्री बनाउनुपर्ने माग राखेका छन् ।