एक वर्षमा बैंकहरुले कमाए सवा ६४ अर्ब, धेरै मुनाफा गर्नेमा नबिल र ग्लोबल

२१ साउन, काठमाडौं । बैंक तथा वित्तीय संस्थाले गत आर्थिक वर्षको वित्तीय विवरण सार्वजनिक गरेका छन् । उनीहरुले प्रकाशित वित्तीय विवरणअनुसार बैंकहरुका मुनाफा बढेको छ । सञ्चालनमा रहेका २० बैंकले आर्थिक वर्ष २०८०/८१ मा ६४ अर्ब १५ करोड खुद मुनाफा गरेका छन् । 

उनीहरुले गरेको मुनाफा अघिल्लो आर्थिक वर्षको भन्दा साढे ८ अर्ब बढी छ । वाणिज्य बैंकहरुले सोमबार प्रकाशन गरेको वित्तीय विवरणका आधारमा नबिल सबैभन्दा बढी मुनाफा गर्ने बैंकमा परेको छ । ग्लोबल आईएमई बैंक दोस्रो स्थानमा परेको छ । यस पटक बैंकहरुका औसत मुनाफा वृद्धि भएको छ । बैंकहरुका मुनाफा अघिल्लो वर्षको यसै अवधिको तुलनामा १३.४० प्रतिशत धेरै हो । अघिल्लो वर्ष २० वटा वाणिज्य बैंकले ५६ अर्ब ५७ करोड ४४ लाख मुनाफा आर्जन गरेका थिए ।

१० वटा बैंकले मुनाफा बढाउँदा बाँकी १० वटा बैंकको मुनाफामा भने गिरावट आएको छ । मुनाफा कमाउने बैंकहरुमा नबिल बैंक, नेपाल इन्भेष्टमेन्ट मेगा बैंक, प्राइम कमर्सियल बैंक, एभरेष्ट बैंक, कृषि विकास बैंकको मुनाफा बढेको छ । यस्तै मुनाफा बढाउनेमा लक्ष्मी सनराइज बैंक, हिमालयन बैंक, कुमारी बैंक र नेपाल एसबीआई बैंक रहेका छन्।

यता मुनाफा घट्नेमा ग्लोबल आइएमइ बैंक, राष्ट्रिय वाणिज्य बैंक, स्टाण्डर्ड चार्टड बैंक, सिद्धार्थ बैंक, सानिमा बैंक, एनएमबी बैंक, नेपाल बैंक, एनआइसी एशिया बैंक, सिटिजन्स बैंक र माछापुच्छ्रे बैंक रहेका छन् । मुनाफाका आधारमा नबिल बैंकले एक नम्बरमा आएको छ । यो बैंक सबैभन्दा धेरै खुद मुनाफा कमाउने बैंक बनेको छ । यसले ७ अर्ब ६ करोड बराबरको खुद मुनाफा आर्जन गरेको छ । यो भनेको अघिल्लो वर्ष (२०७९/८०) को तुलनामा १०.२३ प्रतिशतले बढी हो ।

दोस्रो बढी मुनाफा ग्लोबल आइएमई बैंकको देखिएको छ । यसको मुनाफा अघिल्लो आर्थिक वर्षको भन्दा कम भए पनि समग्र बैंकहरुमा मुनाफाका आधारमा दोस्रो मुनाफा कमाएको हो । ग्लोबल आइएमई बैंकले ६ अर्ब १ करोड मुनाफा कमाएको छ । यद्यपि अघिल्लो वर्षको तुलनामा गत वर्ष यसको खुद मुनाफा भने १०.१३ प्रतिशत घटेको छ । तेस्रो बढी मुनाफा नेपाल इन्भेष्टमेन्ट मेगा बैंकको देखिएको छ । यस बैंकले ५ अर्ब १० करोड रुपैयाँ मुनाफा कमाएको छ । यसको मुनाफा ३९.७१ प्रतिशतले बढेको हो ।

प्राइमले ३ अर्ब ७७ करोड मुनाफा कमाउँदा एभरेष्ट बैंकले ३ अर्ब ७० करोड मुनाफा आर्जन गरेको छ । मुनाफाका आधारमा कृषि विकास बैंक सातौँ र राष्ट्रिय वाणिज्य बैंक आठौँ नम्बरमा परेका छन् । मुनाफाका आधारमा सबैभन्दा पुछारमा माछापुच्छ्रे बैंक रहेको छ । यस बैंकको मुनाफा अघिल्लो वर्षको तुलनामा २३.०९ प्रतिशतले गिरावट आएको छ । असार मसान्तसम्म यस बैंकले १ अर्ब २५ करोड रुपैयाँ मुनाफा गरेको छ । वाणिज्य बैंकहरुले एकै वर्ष साढे ८ अर्ब मुनाफा बढाएका छन् ।