नबिल बैंकले १० प्रतिशतले बढायो मुनाफा

२१ साउन, काठमाडौं । नबिल बैंकले खुद मुनाफा १० प्रतिशतले बढाएको छ । गत आर्थिक वर्ष २०८०/८१ को चौथो त्रैमासिक वित्तीय विवरणअनुसार बैंकले सो अवधिमा ७ अर्ब ६ करोड रुपैयाँ खुद मुनाफा कमाएको छ । जुन अघिल्लो आर्थिक वर्षको तुलनामा १०.२३ प्रतिशत बढी हो ।

अघिल्लो आर्थिक वर्ष २०७९/८० मा बैंकले ६ अर्ब ४० करोड रुपैयाँ खुद नाफा नाफा कमाएको थियो । बैंकको खुद ब्याज आम्दानी घट्दा पनि नाफा बढेको देखिन्छ । बैंकको खुद ब्याज आम्दानी ८.६ प्रतिशत घटेको छ । फी तथा कमिसन आम्दानी बढ्नु र लोन लस प्रोभिजन (इम्पेरिमेन्ट चार्ज) घट्दा मुनाफामा टेवा पुगेको हो । 

बैंकले सार्वजनिक गरेको चौथो त्रैमाससम्मको अपरिष्कृत वित्तीय विवरण अनुसार समीक्षा अवधीमा बैंकको खुद ब्याज आम्दानी ८.६९ प्रतिशत घटेर १६ अर्ब २० करोड ७० लाख रुपैयाँमा सिमित भएको छ भने खुद फि तथा कमिशन आम्दानी १२.०४ प्रतिशतले बढेर ३ अर्ब २४ करोड ३२ लाख रुपैयाँ पुगेको छ ।

त्यस्तै, बैंकको कुल सञ्चालन आम्दानी ६.०२ प्रतिशत घटेर २० अर्ब २० करोड २६ लाख रुपैयाँमा सीमित भएको छ भने सञ्चालन मुनाफा ३.५१ प्रतिशत बढेर ९ अर्ब ८४ करोड ६८ लाख रुपैयाँ पुगेको छ । समीक्षा अवधिमा बैंकको खराब कर्जा १.१८ प्रतिशतबाट घटेर १.०७ प्रतिशत झरेको छ भने इम्पेरमेन्ट चार्ज ३ अर्ब २२ करोडमा सीमित भएको छ। बैंकको निक्षेप १६.४४ प्रतिशत बढेको छ भने कर्जा १२.९४ प्रतिशत बढेको छ ।

समीक्षा अवधिमा बैंकको प्रतिशेयर आम्दानी २ रुपैयाँ ४२ पैसा बढेर २६ रुपैयाँ ९ पैसा पुगेको छ। असार मसान्तसम्ममा बैंकको प्रतिशेयर नेटवर्थ २२० रुपैयाँ १६ पैसा र मूल्य आम्दानी अनुपात २०.०८ गुणा रहेको छ । २७ अर्ब ५ करोड रुपैयाँ चुक्ता पूँजी रहेको यस बैंकको वितरण योग्य मुनाफा भने ३ अर्ब ८५ करोड रुपैयाँ रहेको छ। बैंकको जगेडा कोषमा ३२ अर्ब ५१ करोड रुपैयाँ सञ्चित छ ।