बढी मुनाफा कमाउने दोस्रो बैंकमा पर्यो ग्लोबल आईएमई बैंक

२१ साउन, काठमाडौं । ग्लोबल आईएमई बैंक गत वर्षको बढी मुनाफा कमाउने दोस्रो बैंकमा परेको छ । सोमबार सार्वजनिक वित्तीय विवरण अनुसार ग्लोबलले ६ अर्ब ६९ करोड रुपैयाँ मुनाफा कमाएको छ । बैंकले अघिल्लो आवको भन्दा १०.१३ प्रतिशत बढी मुनाफा गरेको हो । 

अघिल्लो आवमा सबैभन्दा बढी मुनाफा गर्ने बैंक ग्लोबल आईएमई नै थियो । तर, ग्लोबल बैंकको ब्याज आम्दानी बढ्दा मुनाफा भने घटेको छ । जसको मुख्य कारण हो, नोक्सानी व्यवस्थाका लागि आय भन्दा बढी रकम छुट्याउनु । जसकारण आम्दानी ६.७४ प्रतिशतले बढेर ५१ अर्ब ४६ करोड पुगेपनि खुद ब्याज आम्दानी २.७४ प्रतिशतले घटेर १६ अर्ब ६४ करोड कायम भएको छ ।

ग्लोबलले नोक्सानी व्यवस्था रकम भने गत आवको भन्दा ९.२६ प्रतिशत बढी अर्थात् ३ अर्ब ७४ करोड रुपैयाँ छुट्याएको छ । बैंकको सञ्चालन मुनाफा ८.२५ प्रतिशतले घटेर ८ अर्ब ७४ करोड छ भने मुनाफामा १०.१३ प्रतिशतको गिरावट आएको छ । बैंकको वितरण योग्य मुनाफा १ अर्ब १० करोडमात्र छ । जसबाट बैंकको लाभांश क्षमता ३.०६ प्रतिशतमा खस्किएको छ ।

ग्लोबल आईएमई बैंकले ४ खर्ब ८७ अर्ब ४६ करोड रुपैयाँ निक्षेप परिचालन गरी ३ खर्ब ६९ अर्ब ४६ करोड रुपैयाँ कर्जा प्रवाह गरेको छ । बैंकको निक्षेप १४.३४ प्रतिशतले बढेको हो भने कर्जा अघिल्लो आवको भन्दा मात्रै ४.२३ प्रतिशतले विस्तार भएको हो । ग्लोबल आईएमई बैंकको निष्क्रिय कर्जा ३.१५ प्रतिशतबाट बढेर ४.३७ प्रतिशत पुगेको छ । यसैगरी सीडी रेसियो ७५.८७ प्रतिशत कायम भएको वित्तीय विवरणमा उल्लेख छ ।

बैंकको चुक्तापुँजी ३६ अर्ब १३ करोड हुँदा जगेडामा २३ अर्ब ७५ करोड रहेको छ । बैंकको रिजर्भ १८.५४ प्रतिशतले बढेको हो । आव २०८०/८१ को अन्त्यसम्म प्रतिशेयर आम्दानी ५.४१ रूपैयाँले घटेर १६.६५ रुपैयाँ कायम भएको छ । यसैगरी नेटवर्थ १६८.८१ रुपैयाँ र पीई रेसियो ११.६६ रहेको छ ।