इन्भेस्टमेन्ट मेगा बैंकको मुनाफा ४० प्रतिशतले बढ्यो

२१ साउन, काठमाडौं । नेपाल इन्भेस्टमेन्ट मेगा बैंकको मुनाफा ३९.७१ प्रतिशतले बढेको छ । अपरिष्कृत वित्तीय विवरणअनुसार आर्थिक वर्ष २०८०/८१ मा बैंकले ५ अर्ब १९ करोड रुपैयाँ मुनाफा गरेको छ । यो मुनाफा अघिल्लो आवमा गरेको ३ अर्ब ७२ करोडभन्दा १ अर्ब ४७ करोड बढी हो ।

बैंकले प्रकाशन गरेको वित्तीय विवरणअनुसार ब्याज आम्दानी २२.६ प्रतिशतले बढेर ४३ अर्ब ६ करोड र खुद ब्याज आम्दानी २२.०१ प्रतिशतले वृद्धि भइ १५ अर्ब २ करोड रुपैयाँ कायम भएको छ । यस अवधिमा बैंकले अघिल्लो आव छुट्याएको नोक्सानी व्यवस्थाभन्दा ०.१७ प्रतिशत बढी अर्थात् ३ अर्ब २१ करोड प्रोभिजन गरेको छ । बैंकको सञ्चालन मुनाफा २१.६२ प्रतिशतले बढेर ८ अर्ब ७ करोड पुगेको छ ।

बैंकले २०८१ असार मसान्तसम्म ७ खर्ब ३ अर्ब ४२ करोड रुपैयाँ बराबरको निक्षेप परिचालन गरी ३ खर्ब ७ अर्ब ५३ करोड रुपैयाँ कर्जा प्रवाह गरेको छ । बैंकको चुक्तापुँजी ३४ अर्ब १३ करोड र जगेडा कोषमा ३० अर्ब ५७ करोड छ । रिजर्भको रकम २२.५५ प्रतिशतले बढेको हो ।

गत आवको वित्तीय विवरणअनुसार बैंकको प्रतिशेयर आम्दानी १५.२३ रुपैयाँ कायम भएको छ । ईपीएस अघिल्लो आवको तुलनामा १.३१ रूपैयाँले बढ्दा नेटवर्थ १७ रूपैयाँले सुधारिएर १८० रुपैयाँ र पीई रेसियो ११.५ कायम भएको छ । यस अवधिमा नेपाल इन्भेस्टमेन्ट मेगाको निष्क्रिय कर्जा ४.५४ प्रतिशतबाट बढेर ४.९५ प्रतिशत कायम भएको छ ।