सिटिजन्स बैंकको निक्षेप र कर्जामा उल्लेख्य प्रगति, १ अर्ब ३४ करोडले बढ्यो खुद मुनाफा

२० साउन, काठमाडौं । सिटिजन्स बैंक इन्टरनेशनलले गत आर्थिक वर्षमा निक्षेप र कर्जा दुवैमा उल्लेख्य प्रगति गरेको छ । अधिकांश वित्तीय सूचकमा सकारात्मक सुधार यस बैंकले आर्थिक वर्ष २०८०/०८१ मा १ अर्ब ३४ करोड रुपैयाँ खुद मुनाफा कमाएको छ ।

गत आवमा बैंकले ५ अर्ब ६८ करोड खुद ब्याज आम्दानी गरेको छ भने निष्क्रिय कर्जा ४.०७ प्रतिशत कायम गरेको छ । समीक्षा अवधिमा बैंकको प्रतिशेयर आम्दानी ९ रुपैयाँ ४५ पैसा र प्रति शेयर नेटवर्थ १ सय ९१ रुपैयाँ ८१ पैसा रहेको छ । बैंकले समीक्षा अवधिमा ६१ करोड ६१ लाख रुपैयाँ वितरण योग्य नाफा कमाएको छ । अब शेयरधनीलाई ४.३४  प्रतिशत लाभांश वितरणको लक्ष्यमा बैंक पुगेको छ । 

यो आर्थिक वर्षको वितरणयोग्य नाफा ६१ करोड छ । यद्यपि श्रावण अन्त्यसम्म अझै असुली समय बाँकी छ । त्यसैले बैंकले असल ऋणमा १.२% बाट १.१% सम्मको व्यवस्थापन खर्च समावेश गराएको छैन । अघिल्लो आवमा बैंकले १ अर्ब ८६ करोड रुपैयाँ खुद मुनाफा र ८४ करोड ७० लाख रुपैयाँ वितरण योग्य मुनाफा कमाएको थियो ।

बैंकले गत आर्थिक वर्षमा निक्षेप र कर्जा दुवैमा उल्लेख्य वृद्धि गर्न सफल भएको छ । उक्त अवधिमा बैंकले १ खर्ब ९१ अर्ब ६७ करोड रुपैयाँ निक्षेप संकलन गरी १ खर्ब ५८ अर्ब ५८ करोड रुपैयाँ कर्जा प्रवाह गरेको छ । अघिल्लो आर्थिक वर्षको सोही अवधिको तुलनामा निक्षेप संकलन ११.४७ प्रतिशत र कर्जा प्रवाह ९.७६ प्रतिशतले वृद्धि भएको छ । 

समीक्षा अवधिमा बैंकले आधार दर (बेसरेट) समेत एकल अंकमा ल्याउन सफल भएको छ । बैंकले अघिल्लो वर्षको तुलनामा बेसरेट २.२५ प्रतिशत बिन्दुले घटाएर ८.२६ प्रतिशत कायम गरेको हो । कर्जा निक्षेप अनुपात (सीडी रेसियो) र तरलता अनुपात (एलडी रेसियो) सकारात्मक देखिएको छ । गत आवको असार मसान्तसम्म बैंकको सीडी रेसियो ८१.८६ प्रतिशत र एलडी रेसियो २८.०६ प्रतिशत कायम छ । 

राष्ट्र बैंकले सिडि रेसियो ९० प्रतिशत र एलडी रेसियो २० प्रतिशत कायम गरेर मात्रै कर्जा प्रवाह गर्न पाउने प्रावधान गरेको छ । उक्त अवधिमा बैंकको पूँजी पर्याप्तता अनुपातमा समेत सुधार भई १३.०६ प्रतिशत पुगेको छ । अघिल्लो वर्ष यस्तो अनुपात १२.१२ प्रतिशत थियो ।