केन्द्रीय सदस्य खटाएर कांग्रेसले जिल्ला जाउ, संगठन बनाउ अभियान चलाउने, विभागका प्रमुख तोकिँदै

२१ साउन, काठमाडौं । नेपाली कांग्रेसले देशभर संगठन विस्तार अभियानलाई तीब्रता दिने भएको छ । साउन २३ मा बस्ने केन्द्रीय समिति बैठकले केन्द्रीय सदस्यहरूलाई जिल्ला पठाउने कार्यक्रमको ढाँचा पारित गर्ने जनाएको छ । केन्द्रीय नेताहरूलाई अब जिल्ला र गाउँ पठाएर पार्टी संगठन निर्माणमा जोड दिने कांग्रेसको तयारी छ ।  

सोमबार बिहान सभापति शेरबहादुर देउवाको निवास बूढानीलकण्ठमा बसेको पदाधिकारी तथा पूर्वपदाधिकारी बैठकले केन्द्रीय नेता तथा सदस्यहरूलाई संगठन विस्तारका लागि जिल्ला पठाउने निर्णय गरेको प्रवक्ता प्रकाशशरण महतले जानकारी दिए । बलियो संगठन बनाउन कांग्रेसले कार्ययोजना नै बनाउने तयारी गरेको छ । 

साउन २३ गतेदेखि सुरू हुने केन्द्रीय समिति बैठकमा थप छलफल हुन्छ, योजना बन्छ र कसलाई कुन जिल्लामा पठाउने भन्ने निर्णय हुन्छ, उनले भने । सोमबार केन्द्रमा नेता बसेर भएन, संगठन खस्किएको छ,सीमित बाहेक नेता अब संगठन सुदृढीकरण अभियान लिएर जिल्ला जानुपर्छ भन्नेमा नेताले जोड दिएका थिए । उनीहरुलाई जिल्ला तोकेर पठाइनेछ छ । 

बैठकमा महासमितिको गत फागुन ७ देखि १० गतेसम्म चलेको बैठकका निर्णय सुझाव समेटेर केन्द्रीय समितिबाट अनुमोदन गर्नुपर्ने लगायतका विषयमा पनि छलफल भएको महतले जानकारी दिए । संघीय र प्रदेशका सरकारहरूलाई प्रभावकारी बनाउने विषयमा पनि नेताहरूबाट सुझाव दिएका थिए । 

यस्तै कांग्रेस सभापति शेरबहादुर देउवाले पार्टीका ३८ विभागका प्रमुख तोक्ने तयारी गरेका छन् । महामन्त्री गगन थापा र विश्वप्रकाश शर्माले नाम प्रस्ताव गरिसकेको बताइएको छ । आजको छलफलमा विभाग प्रमुख तोक्ने विषयमा नेताहरूले प्रसंग उठाएका थिए ।