ढाकास्थित दूतावास भन्छ-बंगलादेशमा रहेका करिव ४ सय नेपाली विद्यार्थी सुरक्षित छन्

२१ साउन, काठमाडौं ।  बंगलादेशको ढाकास्थित नेपाली दूतावासले त्यहाँ रहेका नेपालीलाई आफू बसेको स्थानमा सुरक्षित रहन र अधिकतम सतर्कता अपनाउन आग्रह गरेको छ । बंगलादेशमा जारी कोटाविरोधी आन्दोलन पुनः चर्किएर हिंसात्मक बनेपछि दूतावासले सोमबार एक सूचना जारी गर्दै यस्तो आग्रह गरेको हो ।

बंगलादेशमा पुनः आन्दोलन चर्किएको छ। केही दिन मत्थर भएको सरकारविरोधी आन्दोलन पुनः चर्किएको हो । सोमबार कम्तीमा पनि ४ लाख मानिस सडकमा उत्रिएको अन्तर्राष्ट्रिय सञ्चारमाध्यमले जनाएका छन् । बंगलादेशमा जारी रहेको विद्यार्थी आन्दोलनका कारण प्रभावित भएका अधिकांश नेपाली विद्यार्थीहरू स्वदेश फर्किसकेका छन् । 

ढाकास्थित नेपाली राजदूतावासले भने सोमबार एक विज्ञप्ति जारी गर्दै बंगलादेशमा अझै करिब ४ सय विद्यार्थीसहित नेपालीहरू रहेको र सबै सुरक्षित रहेको उल्लेख गरेको छ । उनीहरू सबै दूतावाससँगको समन्वयमा रहेको विज्ञप्तिमार्फत जानकारी गराइएको छ ।

दूतावासले नेपालीहरुलाई आफू बसेको स्थानमा सुरक्षित रहन र अधिकतम सतर्कता अपनाउन अनुरोध गरेको छ । नेपाल फर्किन चाहने विद्यार्थीहरू तथा समस्यामा परेका नेपालीले दूतावासका द्वितीय सचिव योजना बम्जन र रिया क्षेत्रीमार्फत सम्पर्कमा आउन आग्रह गरेको छ ।