बंगलदेशबाट भागेर भारतको त्रिपुरा पुगिन् बंगलादेशी प्रधानमन्त्री हसिना

२१ साउन, काठमाडौं । बंगलादेशी प्रधानमन्त्री शेख हसिना भागेर भारतको त्रिपुरा राज्य पुगेकी छिन् । अन्तर्राष्ट्रिय समाचार संस्थाहरूका अनुसार आन्दोलनकारीले आवासमै छिरेर प्रदर्शन गरेपछि देश छाडेर उनी ढाकाबाट हेलिकोप्टरमा उडेकी थिइन् । केहीबेर अघि उनी भारतको त्रिपुरा राज्य पुगेको बताइएको छ । 

आइतबारदेखि हिंसात्मक प्रदर्शन चर्किएपछि प्रधानमन्त्री हसिनाले मुलुक छोडेकी हुन् । यसै बीच गण भवन पुगेका प्रदर्शनकारीले विजयी भावमा उत्सव मनाएका छन् । बंगलादेशी टेलिभिजन च्यानल २४ लाई उद्धृत गर्दै एएफपीले प्रधानमन्त्री निवासमा भीड जम्मा भएको जानकारी दिएको छ ।

बंगलादेशमा केही समय मत्थर बनेको सरकार विरोधी आन्दोलन आइतबारदेखि पुनः चर्किएको थियो । आइतबार बंगलादेशका विभिन्न ठाउँमा सरकार विरोधी प्रदर्शनका क्रममा कम्तीमा ९६ जनाको मृत्यु भएको थियो । विभेद विरोधी विद्यार्थी आन्दोलनको ब्यानरमा भएको प्रदर्शनका क्रममा ठाउँ–ठाउँमा सुरक्षाकर्मीसँग झडप भएको बंगलादेशी सञ्चारमाध्यमले जनाएका छन् ।

अहिले बंगलादेशको शासनसत्ता सेनाले लिएको छ । सेन प्रमुखले देशबासीका नाममा सम्बोधन गरिसकेका छन् । सोमबार कम्तीमा पनि ४ लाख मानिस सडकमा उत्रिएको अन्तर्राष्ट्रिय सञ्चारमाध्यमले जनाएका छन् । ढाकामा सोमबार मात्र प्रदर्शनका क्रममा ६ जनाको मृत्यु भएको छ ।