उपत्यकाका नदी किनारबाट यात्रा गर्दा सतर्कता अपनाउन आग्रह, यस्तो छ देशभरका सडकको अवस्था

२२ साउन, काठमाडौं । जल तथा मौसम पूर्वानुमान महाशाखाले काठमाडौं उपत्यकाका नदी किनारमा यात्रा गर्दा सतर्क रहन भनेको छ । रातिदेखि परेको भारी वर्षाले काठमाडौं उपत्यकाका विभिन्न क्षेत्र डुबानमा परेका छन । डुबानका कारण उपत्यकाको सवारी आवागमन प्रभावित बनेको छ । 

बागमती, मनोहरा, हनुमन्ते, धोबीखोलालगायतका स्थान जल सतहले सतर्कता तह पार गरेको छ । नदी तथा खोला किनारमा रहेका बस्ती बाढी र डुबानको उच्च जोखिममा रहेकाले सतर्कता अपनाउन जल तथा मौसम विज्ञान विभागले अनुरोध गरेको हो । 

यस्तै देशभर बर्षा भइरहेको अवस्थामा नेपाल प्रहरीले देशका मुख्य सडकको अवस्था बारे पनि जानकारी दिएको छ । प्रहरीका अनुसार देशका ९ सडक खण्ड अहिले पुर्णरुपममा अवरुद्ध रहेका छन् भने पाँच सडक खण्ड एकतर्फी रुपमा संचालनमा रहेका छन् ।

अवरुद्ध रहेका सडकमा चतरा बराह क्षेत्रको भित्री सडक, दोलखाको चरिकोट सडक खण्ड, म्याग्दीको बेनी–दरवाङ सडक, कालिगण्डकी कोरिडोर, घोराही–तुलसीपुर सडक खण्ड, भेरी कोरिडोर पूर्णरुपमा अवरुद्ध रहेको छ ।

त्यस्तै महोत्तरीको पुर्वपश्चिम लोकमार्ग र कान्ति लोकपथ एकतर्फी रुपमा संचालित रहेको प्रहरीले जनाएको छ । यी क्षेत्रमा भारी वर्ष पनि भइरहेको छ ।