राजनीतिक रुपमा पुर्वाग्रह राखेर हिलो छ्प्यानु अलग कुरा हो, तर मैले भ्रष्टाचार गरिन र गर्दिनः ओली

२२ साउन, काठमाडौं । प्रधानमन्त्री केपी शर्मा ओलीले आफूले जानेर भ्रष्टाचार नगरेको बताएका छन् । उनले आफ्ना पछाडि कसैले भ्रष्टाचार गरेको भए अलग कुरा तर, आफूले यस्तो नगरेको र नगर्ने बताएका छन् । समृद्ध देश बनाउन भ्रष्टाचार एउटा भयानक तगारो रहेको उनको भनाइ छ । 

मंगलबार सिंहदरबारमा बसेको राज्य व्यवस्था तथा सुशासन समितिको बैठकमा प्रधानमन्त्री ओलीले भ्रष्टाचार निर्मूल पार्न सरकार प्रतिबद्ध रहेको दाबी गरे । ‘समृद्ध देश बनाउने र देशका जनतालाई सुखी बनाउने दिशामा हामी अगाडि बढिरहेका छौँ,’ उनले भने, ‘यसमा एउटा भयानक र खतरनाक तगारो भनेको भ्रष्टाचार हो । भ्रष्टाचार नियन्त्रण गर्न वर्तमान सरकार कटिबद्ध छ ।’

भ्रष्टाचार निवारण ऐन २०५९ लाई संशोधन गर्न बनेको विधेयकमाथि भएको छलफलमा भाग लिँदै प्रधानमन्त्री ओलीले आफूले कहिल्यै भ्रष्टाचार नगरेको बताए । ‘कहिल्यै भ्रष्टाचार गरिनँ, गर्न इजाजत दिएको छैन । मेरो नजरभन्दा बाहिर भएको भए बेग्लै कुरा हो,’ चित्रगुप्तका पनि अगाडि जवाफ दिन तयार रहेको भन्दै उनले भने, ‘मेरो बुताभन्दा बाहिर अरूले गरेको कुरा रोक्न नसकिएको होला । तर गर्न दिएको होइन ।’

छलफलमा रास्वपा सभापति रवि लामिछानेले प्रधानमन्त्रीको प्रतिबद्धता पुरानै भएको भन्दै कसरी भन्ने प्रश्न गरे । दलहरूको संलग्नता जगजाहेर रहेको भन्दै उनले सोधेका थिए, ‘यसलाई अन्त्य गर्न निरन्तरको प्रतिबद्धता पर्याप्त होला र ?’ । प्रधानमन्त्री ओलीले आफूले भ्रष्टाचार नगर्ने र नसहने भन्दै दलीय आधारमा लाञ्छित नगर्न आग्रह गरे ।

जवाफमा प्रधानमन्त्री ओलीले दलीय आधारमा हिलो छ्यापेर चर्चाको खोजी नगर्न सुझाव दिए । यहाँ मेरो प्रतिबद्धता विगतकै जस्तो हो कि ?’ भन्नुभयो, प्रतिबद्धता उस्तै हो, मैले कहिल्यै भ्रष्टाचार गरिनँ र सहिनँ पनि । राजनीतिक रूपमा हिलो छ्याप्नु बेग्लै कुरा, यो घर्तीको अदालत मात्र हैन, चित्रगुप्तको अदालत अगाडि भन्न सक्छु । उनले आफूलाई सम्पत्ति कमाउन आवश्यक नभएको बताए । मलाई कुनै सम्पत्ति आवश्यक छैन । राज्यको सम्पत्ति अपचलन गरेर मलाई आफ्नो बनाउनु छैन, ओलीले भने ।

अरूलाई पनि भ्रष्टाचार गर्न नदिने उनले पटक–पटक दोहोर्याए । सामाजिक सञ्जालमा गाली गरे, मुख छाडेर लेख लेखे होला, बेग्लै कुरा । तर, यहाँ भन्छु– मैले भ्रष्टाचार गरिनँ, कसैलाई गर्न पनि दिएको छैन । उनले भ्रष्टाचारका मामलामा कसैको अनुहार नहेरी कडा नीति अपनाउने सुनाए । प्रचारबाजी हैन यो, देशका लागि काम गर्ने हो । म यस समितिलाई एस्योर (आश्वस्त) गर्न चाहन्छु, ओलीले भने, सरकारको एउटा मात्र गल्ती भेटे पनि समितिमा बोलाउनुस् । कुनै दिन तलमाथि हुन दिन्न, ढुक्क हुनुहोस् ।