त्रिशुली बस दुर्घटनाका मृतक र बेपत्ताका परिवारलाई जनही २ लाखका दरले राहत दिन कार्यदलको सिफारिस

२२ साउन, काठमाडौं । त्रिशुलीमा बेपत्ता दुई बसका बेपत्ता यात्रु र मृतकका परिवारलाई जनही २ लाखका दरले राहत दिन सिफारिस गरिएको छ । कार्यदलले सनाखत भएका १९ जना र बेपत्ता ४० जना  पीडितको घर ठेगाना जिल्ला प्रशासन कार्यालयबाट मगाएर राहत दिनुपर्ने सिफारिस गरेको हो । घाइतेहरूको निःशुल्क उपचारको व्यवस्था गर्न पनि सिफारिस गरिएको छ । 

चितवनको भरतपुर महानगरपालिका–२९ स्थित सिमलताल दुर्घटनाको छानबिन गर्न गृहका सहसचिव छवि रिजालको नेतृत्वमा कार्यदल बनाइएको थियो । उक्त कार्यदलले मंगलबार गृहमन्त्री रमेश लेखकलाई प्रतिवेदन बुझाउँदै बेपत्ता भएकाहरूको परिवारलाई मृतक सरह राहत दिन सिफारिस गरेको हो ।
 
विपद् पीडित उद्धार तथा राहत सम्बन्धी मापदण्ड–०७७ असार परिवारको एकजना सदस्यको मृत्यु भएमा २ लाख र सोही परिवारमा अन्य व्यक्तिको पनि मृत्यु भएमा थप १ लाख रुपैयाँका दरले राहत दिने व्यवस्था छ । प्राकृतिक प्रकोपकै कारण सिमलतालमा दुई वटा डीलक्स बस दुर्घटना भएको निष्कर्ष निकाल्दै कार्यदलले बेपत्ता परिवारलाई पनि सो मापदण्ड अनुसार राहत दिन सिफारिस गरेको हो । 

गृहमन्त्री लेखक पदबहाली भएपछि पहिलो निर्णय गर्दै सिमलताल घटनाको विस्तृत अध्ययनका लागि गृह मन्त्रालयका सहसचिव छवि रिजालको संयोजकत्वमा कार्यदल गठन गरेका थिए । सो कार्यदलले प्रतिवेदन पेश गर्दै विपद व्यवस्थापन लगायत सवारी दुर्घटना न्यूनीकरणको प्रभावकारी व्यवस्थापनका लागि सरोकारवाला निकाय जिम्मेवारीका साथ पहल गर्नुपर्नेमा राय समेत दिएको छ ।

कार्यदलको प्रतिवेदन बुझ्दै गृहमन्त्री लेखकले सडक दुर्घटनाका कारण लामो समयदेखि जन र धनको क्षति भइरहेको प्रति चिन्ता व्यक्त गरे । गृहमन्त्री लेखकले प्रतिवेदन अक्षरशः कार्यान्वयन गर्ने प्रतिवद्धता व्यक्त गर्दै कार्यदलले दिएको सुझाव मन्त्रालयले पनि कार्यान्वयन गर्नुका साथै अरु निकायलाई पनि कार्यान्वयन गर्न लगाउने बताए । सडक दुर्घटना न्यूनीकरणका लागि सबैखाले पहल गरिने उनले बताए  ।