तीन एआईजीको सरुवा : सीआईबीमा थापा, मेट्रोमा बज्राचार्य

२२ साउन, काठमाडौं । सरकारले नेपाल प्रहरीका तीन एआईजीको सरुवा र एक डीआईजीलाई एआईजीमा बढुवा गरेको छ ।

नेपाल प्रहरीतर्फका प्रहरी अतिरिक्त महानिरीक्षक 'एआईजी' दीपक थापालाई केन्द्रीय अनुसन्धान ब्युरोमा, श्यामलाल ज्ञवालीलाई नेपाल प्रहरी प्रधान कार्यालय प्रदेश समन्वय विभागमा, किरण बज्राचार्यलाई काठमाडौँ उपत्यका प्रहरी कार्यालयमा सरुवा गरेको छ ।

एआईजीमा बढुवा भएका रामदत्त जोशीलाई नेपाल प्रहरी प्रधान कार्यालय कार्य विभाग नक्सालमा पदस्थापन गरेको छ ।

त्यसैगरी नेपाल न्याय सेवा कानुन समूहका राजपत्राङ्कित प्रथम श्रेणीका अधिकृत आलोकचन्द्र श्रेष्ठ, परासर ढुङ्गानालाई राजपत्राङ्कित विशिष्ट श्रेणीको सचिव पदमा बढुवा गरेको छ। मंगलवार सिंहदरबारमा बसेको मन्त्रिपरिषद्को बैठकले सो निर्णय गरेको हो ।

बैठकपछि निर्णय सुनाउँदै सरकारका प्रवक्ता एवं सञ्चार तथा सूचना प्रविधि मन्त्री पृथ्वी सुब्बा गुरुङले श्रेष्ठलाई सत्य निरूपण तथा मेलमिलाप आयोगमा र ढुङ्गानालाई नेपाल कानुन आयोगमा पदस्थापन गरेको बताए।