नेपाल र भारतबीचको आजको खेल निकै रोमाञ्चक हुने

२३ साउन, काठमाडौं । काभा वुमन्स नेसन्स लिग भलिबलको उपाधिका लागि आज नेपाल र भारतबीच हुने भिडन्त निकै  रोमाञ्चक हुने भएको छ । खेल हेर्न नेपालका भीभीआईपी र भीआईपी उपस्थित हुने भएका छन् । नेपाली टोलीलाई हौसला दिन प्रधानमन्त्री केपी शर्मा ओली सहभागी हुँदैछन् । 

प्रधानमन्त्री जाने भएपछि सरकारका केही मन्त्री र सचिवहरू पनि उपस्थित हुनेछन् । आज दर्शकहरुको पनि राम्रो उपस्थिति रहने देखिएको छ । फाइनल खेल साँझ ५ बजे त्रिपुरेश्वरस्थित कभर्डहलमा सुरु हुनेछ ।

नेपाल भलिबल संघका अनुसार सर्वसाधारणको पनि उपस्थिति बाक्लो हुने देखिएको छ । ठाउँ सीमित छ । प्रधानमन्त्री ओली खेल हेर्न आउने भएपछि सरकारी कर्मचारी र भीआइपीहरुको पनि संख्या बढ्छ । यसको लागि म्यानेज गर्ने काम भइरहेको छ । सेमिफाइनलमा नेपालले इरानलाई तथा भारतले श्रीलंकालाई सोझो सेटमा हराएर फाइनल भेट पक्का गरेका हुन् ।

त्यसअघि इरान र श्रीलंकाबीच दिउँसो २ बजे तेस्रो स्थानको लागि प्रतिस्पर्धा हुनेछ । यस प्रतियोगितामा नेपाल भारतबीच खेल हुन लागेको यो दोस्रो पटक हो । लिग चरणमा नेपालले पाँच सेटको प्रतिस्पर्धात्मक खेलमा भारतलाई पराजित गर्दै ऐतिहासिक जित हात पारेको थियो । यसले पनि नेपाली दर्शक खेल हेर्न हौसिएका छन् ।