नेपाल टेलिकमका कर्मचारीले भने- सरकार हामीलाई प्रबन्ध निर्देशक चाहियो ?

२३ साउन, काठमाडौं । नेपाल टेलिकमका कर्मचारीले सरकारसँग चाँडो प्रबन्ध निर्देशक नियुक्ति गर्न माग गरेका छन् । नेपाल टेलिकममा प्रबन्ध निर्देशक नियुक्तिमा भइरहेको ढिलाइप्रति चासो राख्दै राजनीतिक चलखेलले लामो समयदेखि प्रबन्ध निर्देशक नियुक्ति रोकिनु दुखद भएको बताएका छन् ।

उनीहरुले विज्ञप्ति जारी गर्दै तीव्र प्रबन्ध निर्देशक नियुक्ति नहुँदा कम्पनीको सेवा विस्तार, गुणस्तर सुधार, ग्राहक सन्तुष्टिका साथै दूरसञ्चारसम्बन्धी नीति कार्यान्वयन गर्नुपर्ने महत्वपूर्ण काम रोकिएको भन्दै अग्रणी दूरसञ्चार सेवा प्रदायक संस्थामा लामो समयदेखि निमित्तको भरमा चल्नु उचित नभएको बताएका छन् । 

कर्मचारी युनियनले प्रबन्ध निर्देशक नियुक्ति प्रक्रिया तीन महिनादेखि थाँती रहँदा यसले अन्योल सिर्जना गरेको जनाएको छ । उम्मेदवारहरूको व्यावसायिक कार्य योजनाको प्रस्तुतीकरण र अन्तर्वार्तासमेत भइसकेको सन्दर्भमा हालसम्म प्रबन्ध निर्देशकको नियुक्ति नहुनुले संस्थामा अन्योल सिर्जना भएको उनीहरुको भनाइ छ । सञ्चार तथा सूचना प्रविधि मन्त्रालयले जेठ २२ मा प्रबन्ध निर्देशक नियुक्तिका लागि दरखास्त आह्वान गरेको थियो । 

मन्त्रालयले आवेदन स्वीकृत भएका १६ जना उम्मेदवारलाई असार २०, २१ र २२ मा कार्ययोजना प्रस्तुतीकरण र अन्तर्वार्तामा बोलाएको थियो । अघिल्लो सरकारकी सञ्चार तथा सूचना प्रविधि मन्त्री रेखा शर्माको अगुवाइमा टेलिकमको प्रबन्ध निर्देशक नियुक्तिको प्रक्रिया अघि बढाइए पनि सरकार परिवर्तनसँगै अन्तिम निर्णय हुन सकेको छैन । टेलिकमको कर्मचारी युनियन प्रतिनिधिहरूले संस्था बाहिरका व्यक्तिलाई प्रबन्ध निर्देशक नियुक्त गरेमा टेलिकमको ढोका बन्द गर्ने चेतावनी उनीहरुको छ ।