शुक्रबार विहान श्री एयरको जहाजमा तनाव, सुर्खेत जाने यात्रुबीच झगडाले फर्कियो पार्किङ

२४ साउन, काठमाडौं । त्रिभुवन अन्तर्राष्ट्रिय विमानस्थलबाट बिहान सुर्खेत उडान भर्ने क्रममा रहेको श्री एयरलाइन्सको विमान धावन मार्गबाट फर्काइएको छ । उक्त विमानमा खराबी देखिएपछि धावन मार्गबाट उड्नै लाग्दा फर्काएर पार्किङमा ल्याइएको थियो । 

शुक्रबार बिहान ७ः३० बजे सुर्खेत उडान तालिका रहेको उक्त विमान धावनमार्गमा पुगेर फर्किएको विमानका यात्रु राष्ट्रिय स्वतन्त्र पार्टीका सांसद बिनिता कठायतले जानकारी दिइन् । विमानका यात्रुको बोर्डिङ सकेर विमान धावनमार्गमा ‘टेकअफ’को अन्तिम ‘प्वाइन्ट’मा पुगिसकेको थियो, एक्कासी विमान फर्काएपछि यात्रुले विमान किन फर्काएको भनी जिज्ञासा राख्दा प्राविधिक कारणले फर्काइएको विमानका कर्मचारीले जवाफ दिएका थिए । 

सांसद कठायतले विमान धावन मार्गबाट उड्नैलाग्ला फर्काइनु एयरलाइन्सको लापरबाही भएको बताइन् । श्री एयरलाइन्सका व्यवस्थापक अनिल मानन्धरले भने विमानका केही यात्रुबीच विवाद भएपछि विमान फर्काएर अहिले सुर्खेत उडानको तयारीमा रहेको बताए । प्राविधिक समस्याका कारण होइन, दुई–चारजना यात्री बीचको विवादले होहल्ला भएपछि पाइलटले विमान फर्काएको उनले बताए । 

नागरिक उड्डयनको मापदण्डअनुरुप यात्रीबीच विवाद भएपछि अर्को प्रक्रिया पुर्याएर यात्रीलाई गन्तव्यमा लैजानुपर्ने हुन्छ । सोही विमानमार्फत यात्रीहरू बोर्डिङ भएर गन्तव्यमा पठाइएको व्यवस्थापक मानन्धरले जानकारी दिए ।