रौतहटमा मोटरसाइकल दुर्घटना हुँदा प्रहरी जवानको मृत्यु

२८ साउन, काठमाडौं । रौतहटको चन्द्रनिगाहापुरमा मोटरसाइकल दुर्घटनामा परेर एकजना प्रहरी जवानको मृत्यु भएको छ। चन्द्रनिगाहपुरबाट सन्तपुरतर्फ जाँदै गरेको मधेस प्रदेश–०३–०३३ प ३३०१ नम्बरको मोटरसाइकल अनियन्त्रित भई दुर्घटना हुँदा २६ वर्षीय प्रहरी जवान नविन कुमार यादवको आईतवार साँझ निधन भएको जिल्ला प्रहरी प्रवक्ता डीएसपी एलिजा गिरीले बताइन् ।

दुर्घटनामा परी गम्भीर घाइते भएका यादवलाई तत्कालै चन्द्रनिगाहपुर स्थित हाइवे ट्रमा सेन्टर अस्पतालमा उपचारका लागि लैजाँदा डाक्टरले मृत घोषणा गरेका थिए। मोटरसाइकल पछाडि सवार २५ वर्षीय नविन कुमार चौधरी घाइते भएको इलाका प्रहरी कार्यालय चन्द्रनिगाहापुरका प्रमुख डीएसपी राजकुमार राईले बताए ।  ​​​​​​घाइते चौधरीको चन्द्रपुरस्थित अस्पतालमा उपचार भइरहेको र घटना सम्बन्धी थप अनुसन्धान भइरहेको प्रहरीले जनाएको छ।