अष्ट्रेलियाका प्रस्तावित राजदूत कान्ता रिजालको सिफारिस धरापमा

२८ साउन, काठमाडौं । इजरायलको राजदूत हुँदा आफैसँग गएका व्यक्तिलाई उतै छाडेर आएको आरोपमा कान्ता रिजालको अष्ट्रेलियाका लागि प्रस्तावित राजदूत पद खोसिने निश्चित भएको छ । इजरायलमै अर्दली (निजी सहयोगी) छाडेर आउने अस्ट्रेलियाका लागि प्रस्तावित राजदूत कान्ता रिजालको नाम संसदीय सुनुवाईका लागि परराष्ट्र मन्त्रालयले नपठाएपछि उनको राजदूत पद धरापमा परेको हो ।  

व्यवस्थापिका संसद् सचिवालय उच्च स्रोतका अनुसार अस्ट्रेलियाका लागि राजदूतमा सिफारिस भएकी भनिएकी रिजालको नाम सरकारले संसदीय सुनुवाईका लागि पठाएको छैन । ‘उहाँको बारेमा यसअघि नै उजुरी परेको थियो,  त्यो विषयमा अनुसन्धान हुँदै गर्दा राजदूतका लागि सिफारिस आयो, अहिलेलाई मन्त्रालयले उनका नाम पठाएको छैन’, परराष्ट्र स्रोतले भन्यो ।

१७ जना प्रस्तावित राजदूतको नाम मात्र आएको संसद् सचिवालयले पठाएको छ । त्यसमा अस्ट्रेलियाकालागि प्रस्तावित राजदूत रिजालको नाम नरहेको संसद् सचिवालयले जनाएको छ । रिजाललाई इजरायलको राजदूतबाट पुष्पकमल दाहाल ‘प्रचण्ड’ नेतृत्वको सरकारले फिर्ता बोलाएको थियो। इजरायलबाट फिर्ता आउँदा उनले अर्दली भने उतै छाडेर आएकी थिइन ।

इजरायल सरकारले अर्दली छाडेको विषयमा त्यहाँस्थित नेपाली राजदूतवास मार्फत नेपाल सरकारलाई ध्यानाकर्षण गराएको थियो । उक्त विषयलाई परराष्ट्र मन्त्रालय भने गुपचुप पार्न खोजेको देखिन्छ । यो विषयमा सरकारले तत्काल छानबिन गरेर दोषी देखिए रिजालमाथि आवश्यक कारबाही गर्ने जनाइएको छ । राजदूत रिजालले अर्दली इजरायलमै छाडेर आएको विषयले नेपालको छबिमाथि नकरात्मक असर परेको छ ।

इजरायली सरकारले नै चासो दिएका कारण त्यहाँस्थित दूतावासले परराष्ट्र मन्त्रालयलाई पत्रचार गरेको हुन सक्ने स्रोतको दावी छ ।  परराष्ट्र मन्त्रालय स्रोतका अनुसार राजदूत रिजालका श्रीमान् कृष्णप्रसाद दुवाडी ( पूर्वसहसचिव) साउदी अरबको दुई कार्यकाल श्रम सहचारी भएर काम गरिसकेका व्यक्ति हुन् । दवाडीले पनि यसअघि त्यसैगरेको हुनसक्ने मन्त्रालयको शंका गरेको छ ।