प्रतिवेदन बनाउन भदौ ७ सम्म कांग्रेस बैठक स्थगित

२९ साउन, काठमाडौं । नेपाली कांग्रेसको केन्द्रीय समितिको बैठक भदौ ७ गतेसम्म १० दिनका लागि स्थगित गरिएको छ । महासमितिको बैठकबाट आएका विषय र केन्द्रीय समिति बैठकमा नेताहरुले राखेका धारणालाई समेटेर प्रतिवेदन बनाउन बैठक १० दिन स्थगित गरिएको हो । 

गत बुधबारदेखि सुरु भएको बैठक सोमबारसम्म चलेर ७ भदौमा पुनः बस्ने गरी स्थगित भएको हो । यसबीचमा कांग्रेसले धारणाहरु समेटेर प्रतिवेदनमा समावेश गर्नेछ । केन्द्रीय समिति बैठकमा उपसभापति पूर्णबहादुर खड्काले नीति, महामन्त्री गगन थापाले सांगठनिक र अर्का महामन्त्री विश्वप्रकाश शर्माले समसायिक प्रतिवेदन पेश गरेका थिए । 

महासमिति बैठकको सुझाव र बदलिएको राजनीतिक घटनाक्रम अनुसार तीन नेताले प्रतिवेदन पनि संशोधन सहित पेश गरेका थिए । पाँच दिन बैठक बसेर ७ भदौसम्मका लागि सारिएको छ । संसद र संसदीय समिति बैठक परेकाले ७ भदौसम्मका लागि पार्टी बैठक स्थगित गरिएको कांग्रेसले जनाएकोे छ । 

सोमबारसम्म अधिकांश केन्द्रीय समितिले बोलेर सकेका छन् । केही पूर्व पदाधिकारी सहित वर्तमान पदाधिकारीका बोल्न बाँकी रहेका छन् ।