देशमा केहि हुँदैन भन्ने युवाहरुको भाष्य गलत हो, सरकारले उनीहरुका लागि उचित नीति ल्याउनुपर्छः कोइराला

२९ साउन, काठमाडौं । नेपाली कांग्रेसका वरिष्ठ नेता डा शेखर कोइरालाले देशका युवाहरूले राज्यमा केही भएन र हुँदैन भन्ने कुरा गर्न नमिल्ने बताएका छन् । उनले युवाले नेपालमा केही भएन भनेर गलत भाष्य खडा गरिरहेको भन्दै यसलाई चिर्न सरकारले युवा अनुकूल नीति बनाउन आवश्यक भएको बताएका छन् । कोइरालाले अहिले दुई तिहाइको सरकार भएकाले युवा लक्षित नीति र कार्यक्रम ल्याउनुपर्नेमा जोड दिए ।

अन्तर्राष्ट्रिय युवा दिवसका अवसरमा फोरएच नेपालले काठमाडौंमा आयोजना गरेको कार्यक्रममा नेता कोइरालाले युवाहरूका लागि उद्यमशीलतामा विकास गर्न सरकारले योजना बनाउनुपर्ने बताए । उनले देशमा रोजगारी र अवसर राम्रो नहुँदा युवाहरू विदेशिने क्रम चलेको भन्दै यसलाई रोक्न युवाहरू नै सक्रिय हुन आवश्यक भएको बताए । कोइरालाले युवाहरूले पनि देशलाई अगाडि लान सकिने योजना बनाउन सक्ने भन्दै उनीहरुका योजनालाई राज्य आत्मसाथ गर्नुपर्ने बताए ।

कोइरालाले युवालाई देशमा रोक्न र यही केही छ भनेर उत्प्रेरणा दिने काम उसको परिवारले पनि गर्न पर्ने बताए । परिवार देशप्रति चिन्तित नभए देश नबन्ने उनको भनाइ छ । नेपालमा युवालाई विकासमा सहभागी बनाउन शिक्षा नीतिमा परिमार्जन गर्न आवश्यक भएको बताए । शिक्षा व्यवहारिक नभएका कारण पनि अहिलेका युवाहरूले आफूले खोजे अनुसारको अवसर पाउन नसकेको बताए । 

उनले नेपालबाट विदेशिने युवाका विषयमा मात्र नभएर विदेशबाट नेपाल फर्किएको युवाहरूका लागि राज्यले फोकस गर्नुपर्ने समय आएको बताए । विदेशबाट युवाहरू सीप लिएर आएका छन् । उनीहरुलाई त्यो सीप उद्यममा बदल्नका लागि आवश्यक लगानी राज्य गरिदिनुपर्ने उनको भनाइ थियो । युवाले नेपालमा केही भएन भन्ने भनाइले विदेशमा पनि राम्रो सन्देश नगएको भन्दै कोइरालले देशको भविश्य हाम्रो हातमा छ भनेर युवा अगाडी आउनुपर्ने बताए । 

कार्यक्रममा नेकपा एकीकृत समाजवादीकी केन्द्रीय सदस्य रामकुमारी झाक्रीले युवालाई राज्यको स्रोत र शक्ति बनाउने कुरामा उसको परिवार लाग्नुपर्ने बताइन । उनले हरेका परिवारमा आफ्नो बच्चालाई स्कुल पढ्दा देखिनै विदेश जानुपर्छ भनेर सिकाइएकाले सबैको ध्यान विदेश भएको बताइन् । झाक्रीले देशका विषयमा अब युवाहरूले चिन्ता लिएर अगाडी आउनुपर्ने र दोस्रो पुस्ताका नेतालाई नीति निर्माण सघाउनुपर्ने बताइन् । 

उनले देशमा युवाका लागि भनेर राज्यले केहि लगानी गरे पनि त्यसमा वास्तविक पक्षभन्दा पनि विचौलियााले फाइदा लिएको बताइन । उनले युवा र कृषिका क्षेत्रमा विदेशबाट ऋण लिएर पनि राज्यले लगानी गरेको तर, त्यो उचित क्षेत्रमा नपुगेकाले तलैबाट सुधार गर्न आवश्यक भएको बताइन । नेकपा एमालेका नेता दिपकप्रकाश भट्टले अहिलेको पुस्तालाई देश विकास र राज्य व्यवस्थाका विषयमा जानकारी दिएर बदलिँदो परिवेस अनुसार युवालाई ढाल्न सक्ने नीति र कार्यक्रम ल्याउन आवश्य भएको बताए ।