जिल्ला अदालत काठमाडौंमा बेचन झाविरुद्ध पूरक अभियोगको मुद्दा दर्ता, पोलिग्राफ परीक्षण भएन

३० साउन, काठमाडौं । नक्कली शरणार्थी प्रकरणका आरोपी बेचन झा विरुद्ध जिल्ला सरकारी वकिलको कार्यालय, काठमाडौंले प्रहरीले तयार पारेको रायसहितको मुद्दा जिल्ला अदालत, काठमाडौंमा दर्ता गरेको छ । मुद्दा मंगलबार दर्ता भएको हो । ठगी र संगठित अपराधको कसुरमा मुद्दा दर्ता गरिएको छ । 

सरकारी वकिलको कार्यालयले झाविरुद्ध अदालतमा पूरक अभियोग दर्ता गरेको हो । जिल्ला प्रहरी परिसर, काठमाडौंले गरेको अनुसन्धानका क्रममा उनले नेपाल र भारतको दोहोरो नागरिकता लिएको समेत खुलेको थियो । अदालतमा दायर अभियोग पत्रमा समावेश झाको बयानमा उनले नक्कली भुटानी शरणार्थी प्रकरणबारे आफूलाई थाहै नभएको जिकिर गरेका छन् । 

तत्कालीन गृह मन्त्रालयका सचिव टेकनारायण पाण्डेले पक्राउ परेपछि बयान दिँदै प्रकरणमा राजनीतिक नेतृत्व मिलाउने जिम्मा झाले लिएको बताएका थिए । अनुसन्धान अधिकृतहरुले प्रकरणमा मुछिएकाहरुले झाको नाममा काटेको तीन करोड रुपैयाँको चेक समेत बरामद गरेका थिए ।

आफूविरुद्ध बयान दिने कसैलाई पनि नचिनेको झाले बताएका छन् । झालाई नेपाल प्रहरीको विशेष टोलीले पक्राउ गरेर १५ असारमा नेपाल ल्याएको थियो । आरोपी बेचन झाले पोलिग्राफ जाँच गराउन नमानेको पनि प्रतिवेदनमा उल्ल्ेख छ । प्रहरीका अनुसन्धान अधिकृतहरुले उनको बयानबारे सत्यता परीक्षण गर्न पोलिग्राफ जाँच गराउने कोसिस गरे पनि नसकेको बताएका छन् । 

सरकारी वकिलको रोहबरमा प्रहरीसँग उनले इन्कारी बयान दिएका थिए । उनले नक्कली भुटानी शरणार्थी प्रकरणबारे आफूलाई केही थाहा नभएको बताएका थिए । अनुसन्धानका क्रममा प्रहरी अर्का आरोपी रामशरण केसीले झाको नाममा काटिदिएको दुई करोड रुपैयाँको चेक पनि बरामद गरेको थियो । त्यसबारे पनि आफूलाई थाहा नभएको उनले बताएका थिए ।