ललितपुरको इमाडोलमा सडक भासियो, सवारी आवागमन अवरुद्ध

३० साउन, काठमाडौं । ललितपुरको इमाडोलस्थित महालक्ष्मी नगरपालिका–३ बाक्लोगाउँ चोक अगाडि नयाँ पुल–बोझेपोखरी हुँदै इमाडोलतर्फ जाने भित्री सडकमा भ्वाङ परेर सवारी आवागमन अवरुद्ध भएको छ । सडकको झण्डै ३ मिटर क्षेत्रमा भ्वाङ परेको सवारी आवागमन अवरुद्ध भएको ललितपुर प्रहरीले जनाएको छ ।

एसपी नरेशराज सुवेदीका अनुसार सडक भासिनुको कारण खुलेको छैन् । महालक्ष्मी नगरपालिका– ३ को बोझे पोखरीबाट इमाडोलतर्फ आउने भित्री सडक गएराति भासिएको हो । भासिएपछि त्यो सडकमा यातायात सञ्चालन गर्न रोक लगाइएको छ । सडकमा झण्डै तीन मिटरका दुईवटा खडल बनेका छन् । जसको कारण त्यो बाटो हुँदै गाडी सञ्चालन गर्न नमिल्ने अवस्था सिर्जना भएको, सुवेदीले बताए । 

यही साउन २५ गते काठमाडौँ महानगरपालिका कार्यालय नजिकको सडक पनि भासिएको थियो । सडक भासिएपछि अहिले दरबारमार्गस्थित महेन्द्र सालिकबाट कमलादीको कृष्ण पाउरोटी चोक निस्किने सडकखण्डमा यातायात सञ्चालन बन्द गरिएको छ । त्यस क्षेत्रमा टुकुचा खोला छोपेर सडक बनाइएको कारण भासिएको हो ।