सरकारले पहिलो त्रैमासमा १ खर्ब १५ अर्ब आन्तरिक उठाउने, ३० अर्ब जति उठिसक्यो

३० साउन,काठमाडौं । सरकारले चालु आर्थिक वर्षको पहिलो त्रैमाससम्ममा १ खर्ब १५ अर्ब रुपैयाँ आन्तरिक ऋण उठाउने भएको छ । चालु आर्थिक वर्षको बजेटमा ३ खर्ब ३० अर्ब आन्तरिक ऋण उठाउने लक्ष्य राखिएको छ । सार्वजनिक ऋण व्यवस्थापन कार्यालयका अनुसार मंगलबारसम्म ३० अर्ब आन्तरिक ऋण उठाइसकिएको छ ।  

कार्यालयका अनुसार हालसम्म ९ र ११ वर्षे अवधिको विकास ऋणपत्र र विभिन्न अवधिका ट्रेजरी बिलमार्फत करिब ३० अर्ब आन्तरिक ऋण उठाइएको हो । आज बुधबार ६ वर्षे विकास ऋणपत्र बिक्री गरिँदैछ । ११ वर्षे विकास ऋणपत्रको औसत ब्याजदर ५.२८ प्रतिशत कायम गरिएको छ । गत वर्ष यस्तो ऋणपत्रको ब्याज ११ प्रतिशत थियो । 

अहिले वित्तीय प्रणालीमा अधिक तरलता र ब्याजदर कम छ । सरकारले सस्तो ब्याजमा ऋण पाउँछ । यसकारण पनि अहिले वित्तीय प्रणालीको अवस्था हेरेर कार्यालयले काम गरिरहेको छ । गत असार मसान्तसम्म तिर्न बाँकी सार्वजनिक ऋण २४ खर्ब ३३ अर्ब छ । त्यसमध्ये चार खर्ब औसत पाँच प्रतिशत ब्याजदरमा सार्वजनिक संस्थानमा ऋण लगानी भएको कार्यालयको भनाइ छ ।  

चालु आर्थिक वर्षका लागि सरकारले १८ खर्ब ६० अर्ब ३० करोड बजेट विनियोजन गरेको छ । चालुतर्फ ११ खर्ब ४० अर्ब ६६ करोड अर्थात् ६१.३१ प्रतिशत, पुँजीगततर्फ ३ खर्ब ५२ अर्ब ३५ करोड अर्थात् १८.९४ प्रतिशत र वित्तीय व्यवस्थातर्फ ३ खर्ब ६७ अर्ब २८ करोड अर्थात् १९.७४ प्रतिशत छ । कुल विनियोजनमा प्रदेश र स्थानीय तहमा वित्तीय हस्तान्तरणतर्फ ४ खर्ब ८ अर्ब ८७ करोड रुपैयाँ छुट्याइएको छ ।

चालु आर्थिक वर्षका लागि अनुमान गरिएको खर्च बेहोर्ने स्रोतमध्ये राजस्वबाट १२ खर्ब ६० अर्ब ३० करोड र वैदेशिक अनुदानबाट ५२ अर्ब ३३ करोड बेहोर्दा ५ खर्ब ४७ अर्ब ६७ करोड न्यून हुने सरकारको अनुमान छ । सो न्यून पूर्ति गर्न वैदेशिक ऋणबाट २ खर्ब १७ अर्ब ६७ करोड र आन्तरिक ऋणबाट ३ खर्ब ३० अर्ब रुपैयाँ संकलन गर्ने सरकारको लक्ष्य छ ।