सांसदको काम समाजलाई गाइड गर्ने हो, संसदमा आएर फाइट गर्ने होइनः प्रधानमन्त्री ओली

३० साउन, काठमाडौं । प्रधानमन्त्री केपी शर्मा ओलीले सांसदहरू अनुशासित हुनुपर्ने बताएका छन् । उनले देश र समाजलाई गाइड गर्न निर्वाचित भएर आएका सांसदले संसद बैठकमा अमर्यादा देखाउने काम भइरहेको प्रति संकेत गर्दे उनले अनुशासित हुनुपर्ने बताए । उनले सम्बोधनको अन्त्यमा सांसदहरुको भूमिकाप्रति प्रश्न उठाए । सांसद संयमित र अनुशासित नबन्दा समाजमा नकारात्मक असर पर्ने उनको भनाई थियो ।

उनले टीआरसी विधेयक संसदबाट पास भएपछि सहमतिका साथ आयोगहरु बनाउने बताए । प्रतिनिधिसभाको बुधबार बसेको बैठकलाई सम्बोधन गर्दै ओलीले टीआरसी विधेयकमा सहमति जुट्नु खुसीको विषय भएको बताए । प्रतिनिधिसभाको कानुन समितिले सहमति जुटाएर टीआरसी विधेयक संसदमा पेश गरेको र आजै संसदले पास गर्ने तयारी रहेको भन्दै उनले सर्वसम्मतिबाट पीडितमैत्री र कुनै करकापमा नपरी सहमतिका साथ यस दस्तावेज अगाडि बढाएको बताए । 

यो हामी सबैका लागि खुसीको विषय भएको प्रधानमन्त्री ओलीले बताए । उनले शान्ति प्रक्रिया थालनी भएको १८ वर्षपछि सङ्क्रमणकालीन न्यायसम्बन्धी कानुनमा सहमति हुनु शान्तिका पक्षधरहरूका लागि खुसीको विषय भएको बताए । बैठकमा समसामयिक विषयमा सम्बोधन गर्दै प्रधानमन्त्री ओलीले सहमतिका साथ कानुन पारित हुने चरणमा पुुगेकाले पारित भएका कानुनलाई कार्यान्वयन गर्न सरकारले यथेष्ट सहजीकरण गर्ने स्पष्ट पारे ।

ओलीले भने, ‘हाम्रो देशमा द्वन्द्व थियो । हामीले शान्ति प्रक्रिया अगाडि बढायौँ । यो प्रक्रिया हाम्रो आफ्नै हिसाबको मौलिक पन हो । हामीले दुनियाँका लागि एक नमुनाका रूपमा शान्ति प्रक्रिया अगाडि बढाएका छौँ । नेपालमा शान्ति प्रक्रियाको अन्तिम किस्ताका रुपमा सत्य निरुपण तथा मेलमिलाप र बेपत्ता पारिएका व्यक्तिहरुको छानिबनसम्बन्धी कानुनलाई लिएका छौँ । राजनीतिक कार्यदल र संसदको सम्बन्धित समितिबाट पीडितकेन्द्रित हुने गरी सर्वसम्मत पारित भइसकेको छ । यस अर्थमा म खुुसी व्यक्त गर्दछु । यो हाम्रो सफलता दुनियाँका लागि उपयोगी हुन सक्नेछन् ।’