कुमार रम्तेल, महेन्द्र भोटे र भविश्वर अर्याललाई जेलबाट झिकाएर समितिले लियो बयान

३० साउन, काठमाडौं । सहकारी ठगीका सम्बन्धमा प्रतिनिधिसभाले गठन गरेको संसदीय विशेष छानबिन समितिले सहकारी ठगी सम्बन्धमा कुमार रम्तेल, महेन्द्र भोटे र भविश्वर अर्यालसँग सोधपुछ तथा बयान लिएको छ । सहकारी संस्थाको बचत रकम दुरुपयोग गरेको अभियोगमा समितिले गोरखा मिडिया नेटवर्क प्रालिका सञ्चालक कुमार रम्तेलसहित चार जनासँग सोधपुछ गरिएको हो । 

समितिका सभापति सूर्य थापाका अनुसार सूर्यदर्शन बचत तथा ऋण सहकारी संस्था पोखराका सचिव तथा गोरखा मिडिया नेटवर्क प्रालिका सञ्चालक कुमार रम्तेलसँग कास्की कारागारबाट ल्याएर सोधपुछ गरिएको हो । समितिले विभिन्न सहकारीको बचत दुरुपयोगमा संलग्न व्यक्तिहरूमध्ये सूर्यदर्शन बचत तथा ऋण सहकारी संस्था, पोखराका पूर्वसञ्चालक शिवकुमार गुरूङ (महेन्द्र भोटे)लाई कास्की सुधार गृहबाट ल्याएर सोधपुछ गरिएको छ । 

समितिले साउन ३० गते स्वर्णलक्ष्मी बहुउद्देश्यीय सहकारी संस्थाका पूर्वअध्यक्ष कल्पनाकुमारी श्रेष्ठसँग पनि सोधपुछ गरेको छ । समितिले सूर्यदर्शन बचत तथा ऋण सहकारी संस्था, पोखराका पूर्वसञ्चालक तथा सफ्टवेयर डेभलपर भविश्वर अर्याललाई पनि कारागारबाट ल्याएर सोधपुछ गरेको छ ।

समितिले अनुसूची १ र २ मा रहेका २९ वटा सहकारीसँग जोडिएका विभिन्न व्यक्तिसँग सोधपुछ जारी राखेको छ । समितिले राष्ट्रिय स्वतन्त्र पार्टी (रास्वपा) का सभापति तथा पूर्वउपप्रधान तथा गृहमन्त्री रवि लामिछानेसँग पछि सोधपुछ गर्ने भएको छ । त्यसको मिति भने तय भइसकेको छैन ।