गट्ठाघर दुर्घटनाको सीसीटीभी फुटेज: ट्राफिक प्रहरीको गम्भिर लापर्वाही, सनाखतमै अलमल

३२ साउन, काठमाडौं । भक्तपुरको गट्ठाघरमा ट्रक र स्कुटर ठोक्किएर भएको दुर्घटनामा नजिकै रहेको ट्राफिक प्रहरीको गम्भिर लापवार्ही देखिएको छ । दुर्घटनाको सीसीटीभी फुटेज शुक्रबार सार्वजनिक गरिएको छ । दुर्घटनामा ओखलढुंगाको चिसंखुगढी गाउँपालिका–४ घर भई हाल काठमाडौँको कपन बस्ने ६५ वर्षका उत्तम कोइरालाको मृत्यु भएको थियो ।

 सुरुमा प्रहरीले समेत घटनाको गलत रिपोर्ट दियो । कहिले पुरुष र कहिले महिला भनेका कारण उक्त घटनामा कसको मृत्यु भयो भन्ने पुष्टि गर्न राति १० बजेसम्म लाग्यो । सुरुमा प्रहरीले नै एक महिलाको ट्रकको ठक्करबाट मृत्यु भएको बतायो । पछि मृत्यु हुने महिलाको पहिचान खुलेको उनका दाजुले आएर सनाखत गरेकोसम्म प्रहरीले भन्यो । तर मृत भनिएकी महिला आफैं प्रहरीको सम्पर्कमा आएपछि घटनाले नयाँ मोड लियो ।

त्यसपछि प्रहरीले सीसीटीभी फुटेज हेर्दा महिला नभई पुरुषको मृत्यु भएको खुल्यो । घटनास्थलबाट बरामद भएका कागजातका आधारमा पनि पुरुष रहेको खुल्यो । ती पुरुषका आफन्त आएर सनाखत गरेपछि दुर्घटनामा मृत्यु हुने महिला नभई ओखलढुंगाको चिशंखुगढी गाउँपालिका–४ खहरे घर भइ काठमाडौं कपनमा बस्दै आएका ६५ वर्षका उत्तम कोइराला छन् ।

त्यो दुर्घटनाको सीसीटीभी फुटेज प्रहरीले उपलब्ध गराएको छ । उक्त फुटेजमा मृतक कोइरालालाई ट्रकले गट्ठाघर चोकनिर ठक्कर दिएर घिसारेको देखिन्छ । दुर्घटनास्थल नजिकै ३ जना ट्राफिक ड्युटीमा खटिएका तर, उनीहरुले कुनै प्रतिक्रिया नदिएको देखिन्छ । मध्यपुर थिमी नगरपालिका–३ गट्ठाघरमा बिहीबार दुर्घटनामा परेको स्कुटर ट्राफिक प्रहरीले नरोकेको फुटेजले पुष्टि गरेको छ । दुर्घटनास्थलको सीसीटीभी फुटेजमा दुर्घटनामा परेको स्कुटर र ट्रक दुबैलाई ट्राफिक प्रहरीले नरोकेको देखिएको हो ।
 
भक्तपुर जिल्ला प्रहरी परिसरका अनुसार, मृतक कोइरालाको शव त्रिवि शिक्षण अस्पताल महाराजगञ्जमा राखिएको छ । घटनापछि बिहीबार दिनभर भक्तपुर क्षेत्र तनावग्रस्त बनेको थियो भने प्रहरी र स्थानीयबीच झडपसमेत भएको थियो । स्कुटरलाई ठक्कर दिने ट्रकका चालक सर्लाहीको मलंगवा नगरपालिका–२ का ३२ वर्षीय सतेन्द्र श्रेष्ठलाई प्रहरीले नियन्त्रणमा लिएको छ । ट्रकलाई भने काठमाडौँ उपत्यका सशस्त्र प्रहरी गण नं. २ मा राखिएको छ ।

प्रहरीका अनुसार सुरुमा ११८ जना प्रहरी परिचालन गरिएको थियो । त्यसबाट पनि भिड नियन्त्रण हुन नसकेपछि विभिन्न जिल्लाहरूबाट थप १३० जना प्रहरी, १२० जना सशस्त्र प्रहरी खटाइएको थियो । उता, गठ्ठाघर दुर्घटनामा मृत्यु भएका उत्तम कोइराला सहिद महेश कोइरालाका भाइ भएको खुलेको छ ।

ओखलढुंगाको चिंखुगढी छहरेका उत्तम कोइरालाका दाजु महेश कोइराला २०३१ सालमा कांग्रेसले थालेको सशस्त्र आन्दोलनका क्रममा राज्य पक्षबाट मारिएका थिए । उनको शव शिक्षण अस्पताल महाराजगंजमा राखिएको छ । मृतकका आफन्तले दुर्घटनाको छानबिनका लागि समिति नबन्दासम्म शव नबुझ्ने अडान लिएका छन् ।