संविधान संशोधन गर्ने विषयमा सबैको सहमति हुनुपर्छ, दुई तिहाइको घमण्ड गर्नुहुन्नः कोइराला

३२ साउन, काठमाडौं । नेपाली कांग्रेसका वरिष्ठ नेता डा. शेखर कोइरालाले संविधान संशोधन गर्ने विषमा सबै सहमति आवश्यक हुने बताएका छन् । उनले संविधान संशोधन देशको आवश्यकता भएकाले यसमा सबैको सहमति जुट्ने विश्वास पनि लिएका छन् । सर्वसहमतिमा नै संविधान संशोधन हुने उनको दावी छ ।  

शुक्रबार मोरङको बुढीगंगा गाँउपालिका वडा नंं. ७ डंग्राहामा आयोजित स्वास्थ्य शिविर कार्यक्रममा सञ्चारकर्मीसँग कोइरालाले कांग्रेस–एमालेको करिव दुई तिहाइ बहुमत रहे पनि सवैको सहमतिमा संविधान संशोधन गर्नुपर्ने बताए । 

संविधान संशोधनका लागि जनमत संग्रहजस्तो जटिल प्रक्रियामा जानुको सट्टा संसदीय विशेष समिति वा आयोग बनाएर गर्न सकिने उनको भनाइ छ । कोइरालाले दुई दलमात्रै मिलेर संविधान संशोधन गर्न खोजे अवस्था झन जटिल हुने बताए । उनले भ्रष्टाचार छानबिनमा हदम्याद तोक्न नहुने र अख्तियारलाई बढी शक्तिशाली बनाउने नाममा निजी क्षेत्रको क्षेत्राधिकार दिन नहुने जिकिर गरे ।