बौद्धमा गाई जात्रा तथा रोपाइँ जात्रा आगामी भदौ ५ गते हुने

३० साउन, काठमाडौं । रोपाइँ जात्रालाई सभ्य, भव्य र व्यवस्थित बनाउने उद्देश्यले गाईजात्रा तथा रोपाइँ जात्रा मूल समारोह समिति, बौद्धले यही भदौ ५ गते गाई जात्रा तथा रोपाइँ जात्राको आयोजना गर्ने भएको छ । 

समितिले आज यहाँ पत्रकार सम्मेलन गरी नेपाल विविध जाति, भाषा, धर्म र संस्कृतिको साझा फूलबारी रहेको र विविधताभित्रको सांस्कृतिक नगरी बौद्धको परम्परागत गाई जात्रा र रोपाइ जात्रालाई जीवित राख्ने उद्देश्यले यस वर्ष पनि जात्रा आयोजना गरिएको जानकारी दियो । 

जात्रामा घिनतिङ नाका कार्यक्रम, घोनाई कार्यक्रम, हाँस्य व्यङ्गय तथा साँस्कृतिक कार्यक्रम, र रोपाइँ जात्रालगायतका कार्यक्रम आयोजना गरिएको समितिका संयोजक जनमङ्गल लामाले बताए । जात्रामा प्रस्तुत हुने विविध विधामा लाखे, रोपार, बाउसे, हाँस्य—ब्यङ्गय, झाँकी, ख्याली, बाल रोपार, बाल बाउसे, बाल लाखे, हलि र घाडा रहेका छन् ।