विजय भण्डारीलाई सोधपुछका लागि प्रहरी पुगेपछि पशुपतिमा तनाव

१ भदौ, काठमाडौं । पशुपतिनाथ मन्दिर परिसरमा एक महिनादेखि सञ्चालित ‘कोटिहोम’ को अन्तिम दिन शुक्रबार प्रहरी प्रवेश गर्दा तनाव सिर्जना भयो । कोटिहोमका मुख्य आयोजक विजय भण्डारीसँग सोधपुछका लागि पुगेका पुगेका प्रहरीमाथि उनका समर्थकले आक्रमण सुरु गरेपछि पशुपति क्षेत्रमा तनाव भएको थियो । त्यहाँ उपस्थित केही व्यक्तिले सादा पोशाकको प्रहरीमाथि हातपात समेत गरेका थिए ।  

प्रहरी पुगे लगत्तै आयोजक भण्डारीले फेसबुक लाइभ गर्दै प्रहरीले बिना पक्राउ पुर्जी आफूलाई गिरफ्तार गर्न खोजेको भन्दै आफ्ना समर्थकलाई आन्दोलनमा उत्रन आह्वान गरेका थिए । साथै उनका समर्थकहरूले सरकार र प्रहरी विरुद्ध चर्काे नाराबाजी गरेका थिए भने आयोजक भण्डारीले देशको अवस्था बङ्गलादेशजस्तो बनाइदिने भनेर भड्काउ अभिव्यक्ति दिएका थिए । भण्डारीलाई पक्राउ गर्न गएको प्रहरी उनका समर्थकको अवरोधपछि रित्तो हात फर्किएको थियो । 

यता काठमाडौं प्रहरीले भने भण्डारीलाई सोधपुछका लागि नियन्त्रणमा लिन खोजिएको बताएको छ । उनलाई पक्राउ गर्न नभई सोधपुछका लागि मात्र गएको काठमाडौं प्रहरी प्रमुख एसएसपी बसन्त रजौरेले जानकारी दिए । रजौरेका अनुसार भण्डारीले प्रहरीबाट लिएको चारित्रक प्रमाणपत्रका विषयमा प्रहरीले सोधपुछ गर्न चाहेको हो ।