क्यानडास्थित नेपाली दूतावासको सुझाव, छोराछोरीलाई लहड र उक्साहटको भरमा क्यानाडा नपठाउनू

१ भदौ, काठमाडौं । नेपालबाट विभिन्न उद्देश्य लिएर क्यानडा पुगेका नेपालीहरूको अवस्था राम्रो नभएको भन्दै क्यानडास्थित नेपाली दूतावासले पर्याप्त जानकारी र तयारी गरेर मात्रै छोराछोरी पठाउन अभिभावकलाई आग्रह गरेको छ ।

अध्ययनका लागि क्यानडा आउन विद्यार्थी तथा अभिभावकलाई सुझाव दिँदै दूतावासले लहड र अरूको उक्साहटमा आउने विद्यार्थीले धेरै दुःख भोगिरहेको जानकारी गराएको छ । 

दूतावासले आफूले अध्ययन गर्ने कलेज, अध्ययन गर्ने विषय, लाग्ने खर्च, कलेज रहेको सहर आदिबारे पर्याप्त जानकारी लिएर मात्रै प्रक्रिया अगाडि बढाउन सुझाएको छ । अतिरञ्जित प्रचार भर परेर पूर्ण तयारी नगरी आउँदा विद्यार्थीले विविध समस्या व्यहोर्नु परेको यथार्थलाई ध्यान दिन पनि दूतावासले आग्रह गरेको छ ।