साउनमा राजश्व: खर्चभन्दा दोब्बर, लक्ष्यभन्दा २६ अर्ब कम

२ भदौ, काठमाडौं । साउनमा सरकारी खर्चको अनुपातभन्दा राजश्व बढी उठेपनि बजेटमा राखिएको लक्ष्यभन्दा कम उठेको छ । चालु आर्थिक वर्षको पहिलो महिना साउनमा सरकारी बजेट खर्चभन्दा राजस्व संकलन बढी छ । महालेखा नियन्त्रक कार्यालयका अनुसार गत साउन महिनामा ४० अर्ब २० करोड ७६ लाख बजेट खर्च भएको अवस्थामा आम्दानी भने ९६ अर्ब ९५ करोड ७१ लाख बराबर देखिएको छ । 

यता, साउनमा १ खर्ब २० अर्ब ५१ करोड राजस्व संकलन गर्ने सरकारको लक्ष्य रहेपनि ९४ अर्ब ७४ करोड मात्र उठेको छ । साउनमा ९४ अर्ब ७४ करोड राजस्व संकलन गरेको छ । यो सरकारको वार्षिक लक्ष्यको ६.६८ प्रतिशत हो । तर, सरकार आफैंले तय गरेको साउनको राजस्व संकलनको लक्ष्यभन्दा करिब २५ अर्ब ७७ करोड ३१ लाख अर्थात २१.३९ प्रतिशत कम हो । 
 
एक महिनामा चालुतर्फ १२ अर्ब ३८ करोड २२ लाख अर्थात् वार्षिक लक्ष्यको एक दशमलव ०९ प्रतिशत र पुँजीगततर्फ आठ अर्ब ५५ करोड ४८ लाख अर्थात् वार्षिक लक्ष्यको दुई दशमलव ४३ प्रतिशत बराबर छ । पुँजीगततर्फ वार्षिक लक्ष्यको पाँच दशमलव २५ प्रतिशत अर्थात् १९ अर्ब २७ करोड छ लाख बराबर खर्च भएको छ । चालु आर्थिक वर्षका लागि सरकारले चालुतर्फ ११ खर्ब ४० अर्ब ६६ करोड ४५ लाख, पुँजीगततर्फ तीन खर्ब ५२ अर्ब ३५ करोड ४० लाख र वित्तीय व्यवस्थातर्फ रु तीन खर्ब ६७ अर्ब २८ करोड ४५ लाख बराबर विनियोजन गरेको छ ।

चालु आर्थिक वर्षको पहिलो महिना सरकारले वैदेशिक अनुदान लिएको छैन । साउन महिनाको कुल संकलित राजस्वमध्ये कर राजस्व रु ७७ अर्ब ४१ करोड २७ लाख र गैरकर राजस्व रु १७ अर्ब ३३ करोड छ । साउनमा १ खर्ब २० अर्ब ५१ करोड रुपैयाँ राजस्व संकलन गर्ने सरकारको लक्ष्य थियो । गत आर्थिक वर्षको साउनमा सरकारले ९९ अर्ब ५७ करोड २५ लाख रुपैयाँ राजस्व संकलन गर्ने लक्ष्य लिएकामा ७८ अर्ब ८७ करोड ४१ लाख अथवा ७९.२१ प्रतिशत राजस्व उठेको थियो ।

महालेखाका अनुसार चालु आर्थिक वर्षको पहिलो महिनामा ८ अर्ब ५५ करोड रुपैयाँ पुँजीगत खर्च भएको छ । यो वार्षिक लक्ष्यको २.४३ प्रतिशत हो । यो गत आर्थिक वर्षको सोही अवधिको तुलनामा बढी हो । ०८० साउनमा सरकारले ८२ करोड ३१ लाख रुपैयाँ अथवा वार्षिक लक्ष्यको ०.२७ प्रतिशत पुँजीगत खर्च गरेको थियो । गत साउनमा वार्षिक लक्ष्यको १.०९ प्रतिशत अथवा १२ अर्ब ३८ करोड २२ लाख रुपैयाँ चालु खर्च भएको छ । गत आर्थिक वर्षको सोही अवधिमा यस्तो खर्च १२ अर्ब १३ करोड ५८ लाख अथवा लक्ष्यको १.०६ प्रतिशत थियो ।

यस आर्थिक वर्ष सरकारले राजस्वबाट १२ खर्ब ६० अर्ब ३० करोड र वैदेशिक अनुदानबाट ५२ अर्ब ३३ करोड रुपैयाँ स्रोत जुटाउने लक्ष्य तय गरेको छ । स्रोत अपुग हुने ५ खर्ब ४७ अर्ब ६७ करोड रुपैयाँ ऋणमार्फत जुटाउने सरकारको योजना छ । यसअनुसार वैदेशिक ऋणबाट २ खर्ब १७ अर्ब ६७ करोड र आन्तरिक ऋणबाट ३ खर्ब ३० अर्ब जुटाउने सरकारको लक्ष्य छ ।