संक्रमणकालीन न्याय तथा मेलमिलाप सम्बन्धीको टीआरसी विधेयकमा मोहन बैद्यले खोजे स्वामित्व

२ भदौ, काठमाडौं । १० वर्ष सशस्त्र विद्रोहको नेतृत्वमा रहेको आफूलाई द्वन्द्वकालीन घटनासँग सम्बन्धित टीआरसी विधेयकमा दलीय सहमति जुटाउँदा नसोधिएको भन्दै मोहन बैद्य नेतृत्वको क्रान्तिकारी कम्युनिस्ट पार्टीले असन्तुष्टि जनाएको छ । उसले सत्य निरूपण तथा मेलमिलाप सम्बन्धी विधेयक (टीआरसी) आफूलाई स्वामित्वबाहिर राखिएको भन्दै ५ बुँदे असहमति प्रकट गरेको छ । 
 
लामो समयदेखि विचाराधीन रहेको विधेयक संसदबाट पारित गरिनु सकारात्मक भएपनि त्यस सन्दर्भका केही महत्वपूर्ण विषयमा पार्टीको विरोध तथा असहमति गरेको प्रवक्ता हेमन्त प्रकाश ओलीले जारी गरेको विज्ञप्तिमा उल्लेख छ । विधेयक निर्माण गर्ने प्रक्रियामा आफ्नो पार्टी लगायत नेतालाई सहभागि नगराइएको प्रति उसको असन्तुष्टि छ । 

आफ्नो पार्टी लगायत सम्बन्धित सबै सरोकारवालाहरूसित आवश्यक विचार विमर्श नगर्नु तथा राय सुझाव नलिनु गम्भीर गल्ती भएको विज्ञप्तिमा उल्लेख छ । यस्तै विधेयकबारे निर्णय लिने प्रक्रियामा संसदमा पनि छलफल बहस नचलाइनु र रहस्यमय तरिकाले पारित गरिनुभित्र गम्भीर षडयन्त्र लुकेको पार्टीले जनाएको छ । 

उक्त प्रकारको विरोध तथा असहमतिका बिच पारित हुन भइसकेको विधेयकलाई विवेकसम्मत तथा न्यायपूर्ण ढंगले प्रयोगमा ल्याइयोस् ल्याइनुपर्ने भन्दै विज्ञप्तिमा राज्यसत्ताको यो षडयन्त्रपूर्ण रवैयाप्रति सजग रहन समेत आह्वान गरिएको छ । बृहत शान्ति सम्झौता गर्दा पनि महोन बैद्य मुख्य भूमिकामा थिए । तर, पछि पार्टी विभाजन गरेर गएपछि राजनीतिबाटै उनको अस्तित्व हराउँदै गएको छ ।