गलत उदेश्य राखेर कांग्रेस र एमालले अपवित्र गठबन्धन बनाएः प्रचण्ड

२ भदौ, काठमाडौं । नेकपा माओवादीका अध्यक्ष पुष्पकमल दाहाल प्रचण्डले नेपाली कांग्रेस र नेकपा एमालेबीचको सहमति अपवित्र भएको बताएका छन् । उनले यो सहकार्यको उदेश्य पनि गलत भएको दावी गरेका छन् । यसकाविरुद्ध आफु सडक र सदन संघर्षमा लाग्ने उनको भनाइ छ ।  

२०५१ सालमा शहीद भएका तात्कालीन एकता–केन्द्रका केन्द्रीय सदस्य रामवृक्ष यादवको स्मृतिमा पार्टी मुख्यालय पेरिसडाँडामा आयोजित कार्यक्रममा अध्यक्ष प्रचण्डले जनताका मुद्दा खोसिने हुन् कि भन्ने आशंका जन्मिएको बताए । उनले कांग्रेस एमालेको मिलनले धेरै प्रश्नहरू जन्मिएको बताए । 

जनताका मुद्दा रक्षा गर्न जनतामा जानुको बिकल्प छैन, मैले सदन र सडकबाट संघर्षको बिकल्प देखेको छैन । हामीले राम्रो काम गरेका कारण विरोधीहरू आत्तिएर नयाँ गठबन्धन गरिएको छ । यो अपवित्र छ, यसको उद्देश्य गलत छ । पार्टीलाई सुदृढ गर्ने, अझ बलियो बनाउनेतिर हामी अगाडि बढेका छौँ, उनले भने । पार्टीलाई सुदृढ र एकतावद्ध गर्दै जनतामा जाने अभियानको गृहकार्य गरिएको उनले बताए । 

अध्यक्ष प्रचण्डले जनयुद्धको आधार तयार पार्न मधेशमा रामवृक्ष यादवको गुणाात्मक योगदान रहेको बताए । उनले भने, रामवृक्ष यादव मधेशी जनताको आन्दोलनको बीचबाट जन्मिएको एक जना लोकप्रिय नेता भएको भनाइ राखे । प्रचण्डले जनताका मुद्दाका रक्षाका निम्ति माओवादी केन्द्रले संघर्षको मोर्चालाई सुदृढ गर्नेसमेत बताए ।