मुग्लिनमा गुडिरहेको कारमाथि ढुंगा खस्यो, यात्रु सुरक्षित

४ भदौ, चितवन । चितवनको नारायणगढ मुग्लिन सडकखण्डमा गुडिरहेको कारमाथि ढुंगा खस्दा कारमा सामान्य क्षति पुगेको छ । मंगलबार बिहान आठ बजे मुग्लिङबाट नारायणगढतर्फ आउँदै गरेको बागमती विएडी ८३२२ नम्बरको कारलाई इच्छाकामना गाउँपालिका वडा नम्बर पाँच को ३ नम्बर पुलमा माथिबाट ढुंगा खसेर लागेको  हो । 

प्रहरीका अनुसार कारमा सामान्य क्षति भएको छ भने अन्य केही भएको छैन । कार भरतपुर महानगरपालिका –२ बस्ने सन्तोष कचिलाले चलाइरहेका थिए । अहिले सडक सञ्चालनमा छ । कार आफ्नो गन्तव्यतर्फ गइसकेको प्रहरीले जनाएको छ । गएराति देखि नै चितवनसहितका आसपासका क्षेत्रमा पानी परिरहेको छ । सावधानी अपनाएरमात्रै यात्रा गर्न प्रहरीले अनुरोध गरेको छ ।

असार २८ गते पनि सोही सडकखण्डमा यात्रुवाहक बसमाथि ढुंगा खस्दा चालकको मृत्यु भएको थियो । कारमा समान्य क्षति पुगपछि सवार मानिस सुरक्षित छन् । मुग्लिन मलेखु सडकखण्डको मौवाखोला र फिस्लिङमा लेदोसहितको पहिरो खसेर  सडक एकतर्फी संचालन भएको प्रहरीले जनाएको छ ।