देउवा र कोइरालाको कोपभाजनमा कोशी सरकार, दुई महिनादेखि बन्द छ प्रदेशसभा

४ भदौ, विराटनगर । नेपाली कांग्रेसको अर्घेल्याइले कोशी सरकार अस्थिर बनेको छ । केन्द्रमा गठबन्धन फेरिएपछि माओवादीका मन्त्रीहरूले साउन २१ गते राजीनामा दिएका थिए । त्यसयता सरकार विस्तार हुन सकेको छैन् । कांग्रेसले मन्त्री पठाउन सकेको छैन् । मुख्यमन्त्री हिक्मत कार्कीले सरकारलाई पुर्णता दिन सकिरहेका छैनन् । प्रदेशसभाको बैठक पनि गएको असार ८ गतेपछि बस्न सकेको छैन् । 

केन्द्रमा समीकरण परिवर्तन भएपछि सबै प्रदेशमा त्यही अनुसार सरकार बनिसकेका छन । तर, मुख्यमन्त्री कायम रहेर पनि सरकार विस्तार हुन सकेको छैन् । कांग्रेसमा मन्त्रीको विषयलाई लिएर सभापति कोइराला र वरिष्ठ नेता शेखर कोइरालाबीच टसल छ । कोशीका विषयमा देउवाले भन्दा शेखर कोइरालाले बढी चासो राख्नुपर्ने हो । तर, कोइरालाले भनेअनुसार देउवाले मन्त्रीमा सहमति नदिँदा उनी पनि अलमलमा परेका छन् ।  

नेपाली कांग्रेस कोशी प्रदेशका प्रमुख सचेतक गोपाल तामाङले मन्त्री बन्नेको नाम दिन केन्द्रले ढिलाइ गरेको बताए । कांग्रेसले मन्त्रीको नाम नपठाउँदा कोशीको प्रदेशसभा बैठकसमेत अनिश्चित बनेको छ । मन्त्रिपरिषद् विस्तारमा ढिलाइ हुँदा प्रदेशसभाको बैठक आव्हान हुन सकेको छैन । असार ८ मा बजेट पास भएसँगै सभामुख अम्बरबहादुर विष्टले अर्को सूचना नहुन्जेलसम्मका लागि बैठक स्थगित गरेका थिए । 

अहिले नेकपा माओवादीले बठैक बोलाउन दवाव दिइरहेको छ । माओवादी संसदीय दलका नेता इन्द्र आङ्बोले एक साताअगाडि नै प्रदेश सभा बैठक बोलाउन माग गरेका थिए । तर, सरकारले अहिलेसम्म जवाफ दिन सकेको छैन् । सभामुख पनि चुपचाप बसेका छन् । एमालेबाट पनि सदन बोलाउन माग भइरहेको छ । कांग्रेसकै कारण सबै काम रोकिएको एमालेका नेताहरु बताउँछन् । 
 
कोशी प्रदेश सरकारमा सहभागी हुने मन्त्रीहरूको नाम नदिँदा मुख्यमन्त्री हिक्मत कार्कीले कांग्रेसलाई सरकारमा ल्याउन सकेका छैनन् । मन्त्रीका आकांक्षी र सबै गुटकालाई मिलाउनुपर्ने दवावले कांग्रेसले निर्णय गर्न सकेको छैन् । सभापति देउवा र नेता कोइरालाबीच नै सहमति हुनुपर्ने अवस्था छ । नेपाली कांग्रेस कोशी प्रदेशका प्रमुख सचेतक गोपाल तामाङले पनि मन्त्री बन्नेको नाम दिन केन्द्रले ढिलाइ गरेका कारण प्रदेश संसदीय दल पनि अन्योलमा परेको बताएका छन् ।