कृषि अनुदान लिएर काम नगर्नेहरुको नाम सार्वजनिक गरिने, राज्यको ठूलो रकम अपचलन

४ भदौ, काठमाडौं । कृषि तथा पशुपन्छी विकास मन्त्रालयले यसअघि कृषि अनुदान लिएर काम नगर्नेहरुको नाम सार्वजनिक गर्ने भएको छ । केही दिनमा कृषि मन्त्रालयबाट ठूलो मात्रामा अनुदान लगेर काम नगर्नेहरूको सूचि सार्वजनिक गर्ने तयारी भएको मन्त्री रामनाथ अधिकारीले जानकारी दिएका छन् । 

मंगलबार काठमाडौंमा आयोजित एक कार्यक्रममा मन्त्री अधिकारीले ठूलो परिमाणमा अनुदान लग्नेहरूको कुनै काम नदेखिएको र राज्यको ठूलो रकम अपचलन भएकाले उनीहरुको नाम सार्वजनिक गरेर कारवाहीको दायरामा ल्याउने बताए ।

उनले भने, कृषि मन्त्रालयले पछिल्लो २/५ वर्षको बीचमा अरबौं रुपैयाँ अनुदान दिएको रहेछ । २०/२५ लाखको कुरा होइन, ठूला अनुदान लिनेको जरोकिलो केही पनि छैन । यो खोजी गरेर सार्वजनिक गर्नुपर्छ भनेर मन्त्रालयका कर्मचारीलाई लगाएको छु । अनुदान लाने कसैले नाम दिंदैन भने कसले दिंदैन ? म कहाँ ल्याउ भनेको छु । केही दिनमा यो पनि सार्वजनिक हुन्छ ।

मन्त्री अधिकारीले दुग्ध विकास संस्थानले जनतासँग उधारोमा दूध किनेर पैसा नतिर्न सुहाउँछ भन्दै प्रश्न गरे । ६५ रुपैयाँमा किनेको दूध ९५, ९८ र १०० रुपैयाँ लिटरमा बिक्री गरेर बीचमा ३० रुपैयाँ पनि लिने, त्यसको मख्खन पनि झिक्ने अनि किसानलाई  पैसा छैन भनेर नदिने, यस्तो हुन सक्दैन, उनले भने । मन्त्रीमा पद बहाली भएपछि २५ करोड रुपैयाँ दूध किसानको हातमा गइसकेको उनले बताए । उनका अनुसार अब डेढ अरब रकम किसानलाई तिर्न बाँकी छ । 

किसानलाई तत्काल बिमा निर्धारण गर्न फाइल अर्थ मन्त्रालय पठाए पनि त्यहाँबाट सहमति प्राप्त नभएको मन्त्री अधिकारीले जानकारी दिए । राज्यप्रति जनताको भरोसा टुटेकोले उत्साह जगाउन सबैले भूमिका खेल्नुपर्ने उनले बताए । मन्त्री अधिकारीले कृषि मन्त्रालय र साँच्चैका किसानको बीचमा ठूलो खाडल रहेको र त्यसलाई कसरी पुर्ने भनेर लागि परेको दावी गरे ।