सहमतिमै संविधान संशोधन हुन्छ, प्रचण्ड र माधवकाविरुद्ध लाग्न यो गठबन्धन बनाएको हैनः देउवा

४ भदौ, काठमाडौं । नेपाली कांग्रेसका सभापति शेरबहादुर देउवाले देशको भविश्व कोर्नका लागि कांग्रेस र एमालेबीच समीकरण भएको बताएका छन् । उनले अहिलेको गठबन्धन कसैकोविरुद्धमा नबनाइएको बताएका छन् । यो सत्ता समीकरणले कसैलाई अहित नगर्ने र देशका समस्याप्रति केन्द्रित हुने उनको भनाइ छ ।  
 
मंगलबार राजधानीमा आयोजित नेपाली कांग्रेसका स्वर्गीय नेता तथा समाजवादी चिन्तक प्रदीप गिरीको दोस्रो स्मृति सभालाई सम्बोधन गर्दै उनले कांग्रेस र एमालेको गठबन्धन कुनै पनि पार्टीको विरुद्धमा नभएको स्पष्ट पारे । गठबन्धन अरू पार्टीको खिलाफ हैन । माओवादी‚ माधवजीको पार्टी लगायत सबैलाई एक गरेर लैजाने, सबैलाई एक साथ राखेर अघि बढ्ने हो, सबैको साथ भएमात्र देशलाई एउटा विन्दुमा पुर्याउन सकिन्छ, उनले भने । 

सभापति देउवाले कांग्रेस र नेकपा एमालेको गठबन्धन बनाउन कसैले दबाब नदिएको पनि बताए । संविधान संशोधन सबै दलहरूको सल्लाह सुझावमा नै हुने भएकाले कुनै पनि शंका उपशंका नगर्न उनले आग्रह गरे । राष्ट्रिय सभाको अध्यक्ष उपराष्ट्रपतिलाई बनाउने लगायत विषय संविधान संशोधनको एजेन्डाभित्र पर्ने बताए । 

उनले भने, संविधान संशोधन षड्यन्त्र गरेर हैन ।  सबैसँग सल्लाह गरेर गरिने कुरा हो । केपी शर्मा ओली र मेरो बिचमा भएको सहमति कसैको दबाबमा हैन । देउवाले अहिलेको गठबन्धनले नेपालको भोलिको राजनीति र भविष्यलाई योगदान दिने समेत दाबी गरे । उनले एउटा राजनीतिक दलको नेताले अर्को दलको नेतालाई गाली गरेर कसैको भलो नहुने बताए ।