बुधबार २९६८.४४ विन्दुमा कायम रह्यो नेप्से, १८ अर्ब ९० करोड बराबरको शेयर खरिदबिक्री

५ भदौ, काठमाडौं । बुधबार शेयरबजारमा १८ अर्ब ९० करोड बराबरको कारोबार भएको छ । दिनभरिको कारोबारमा नेप्से परिसूचक २.११ अंकले बढेर २९६८.४४ विन्दुमा बन्द भयो । नेपाल स्टक एक्सचेन्जका अनुसार बुधबार उतारचढावकाबीच बजार झिनो अंकले बढेर बन्द भयो । 

बुधबार चार कम्पनीको शेयर मूल्य १० प्रतिशतले बृद्धि भयो । यसरी शेयर मूल्य १० प्रतिशतले बृद्धि हुनेमा कर्पाेरेट डेभलपमेन्ट बैंक, सिन्धु विकास बैंक, रिलायन्स फाइनान्स र डोल्टी पावर कम्पनी लिमिटेड छन् । कर्णाली डेभलपमेन्ट बैंकको शेयर मूल्य भने १० प्रतिशतले घट्यो । 

कारोबारका क्रममा नेप्से परिसूचक घटेर २९४३.६१ विन्दुसम्म झरेको थियो । त्यसपछि बजार सुधार भएर बन्द हुँदासम्म १८ अर्ब ९० करोड ६३ लाख रुपैयाँको कारोबार भयो । आज फाइनान्स, विकास बैंक, वाणिज्य बैंक, ‘अन्य’ र लगानी समूहको परिसूचक बढे भने बाँकी समूहको परिसूचक घटे । 

सर्वाधिक परिसूचक घट्नेमा व्यापार समूह छ । यो समूहको परिसूचक २.०९ प्रतिशतले घटेको छ । सर्वाधिक परिसूचक वृद्धि फाइनान्स समूहको भएको छ । यो समूहको परिसूचक ४.९९ प्रतिशतले वृद्धि भएको छ ।