एसएसबीका महानिर्देशक चौधरीको नेपाल भ्रमण स्थगित !

५ भदौ, काठमाडौं । भारतीय सीमा सुरक्षा बल सशस्त्र सीमा बल 'एसएसबी' का महानिर्देशक दलजितसिंह चौधरीको नेपाल भ्रमणमा अचानक रोकिएको छ । सशस्त्र प्रहरी बल, नेपालका महानिरीक्षक 'आईजीपी' राजु अर्यालको निमन्त्रणामा नेपाल आउन लागेका चौधरीले भ्रमण स्थगित गरेका हुन् । 

नेपालको तीनदिने औपचारिक भ्रमणमा आउन लागेका चौधरीलाई भारतमा बंगलादेशसँग जोडिएको सीमा क्षेत्रको सुरक्षाको विषयमा समेत थप जिम्मेवारी लिनु परेका कारण तत्काललाई रोकिएको सशस्त्र प्रहरी बल नेपालले जनाएको छ  । 

सशस्त्र प्रहरी बलका प्रवक्ता सशस्त्र प्रहरी नायब महानिरीक्षक 'डीआईजी' कुमार न्यौपानेका अनुसार भदौ ५, ६ र ७ गते काठमाडौंमा हुने सीमा सुरक्षासम्बन्धी आठौं बैठकमा भाग लिन उनी आउन लागेका उनी भारतमा थप जिम्मेवारी लिनुपरेपछि केही दिन भ्रमण रोकिएको हो । 

नेपाल र भारतमा आलोपालो आयोजना हुने सीमा सुरक्षासम्बन्धी बैठक यस पटक नेपालले आयोजना गर्दै छ । सातौं बैठक भारतमा आयोजना भएको थियो । बैठकमा सीमा अपराध, अवैध चोरी निकासी, मानव तस्करी नियन्त्रणसहितका विषयमा छलफल हुने छन् । 

चौधरी अहिले भारतको बोर्डर सेक्युरिटी फोर्स 'बीएसएफ' का प्रमुख भएका कारण उनले बंगलादेशको सीमा सुरक्षा पनि हेर्नुपर्ने भएकाले व्यस्त भएको र नेपालमा हुने बैठक पनि केही समय सरेको नेपाली पक्षको दावी छ ।