मधेश पुगेर गृहमन्त्रीले भने, प्रहरीसम्बन्धी नयाँ कानुन बनाउन मैले मन्त्रालयबाट निर्णय गरिसके

६ भदौ, जनकपुर । धनुषा र महोत्तरीको विभिन्न कार्यक्रममा सहभागी हुन बिहीबार जनपुर आएका गृहमन्त्री रमेश लेखकले नेपाल प्रहरीसम्बन्धी नयाँ कानुन बनाउन आफूले मन्त्रीस्तरीय निर्णय गरिसककोे बताएका छन् ।

उनले प्रदेशमा आफ्नै प्रहरी गठनका लागि काम अगाडि बढेको बताएका छन् । गृह मन्त्रालयबाट प्रदेश प्रहरी गठनका लागि आवश्यक सबै प्रक्रिया पूरा गरिसकिएको उनको भनाइ छ । 

लेखकले प्रदेश सरकारकै मातहतमा प्रहरी दिनका लागि नेपाल प्रहरी ऐन २०१२ मा आवश्याक संशोधन र परिमार्जनका लागि गृह मन्त्रालयले निर्णय गरिसकेको जानकारी दिए ।  

जनकपुर विमानस्थलमा बिहीबार बिहान सञ्चारकर्मीसित कुरा गर्दै गृहमन्त्री लेखकले विभिन्न मन्त्रालयको सहमतिपछि कानुन संसदमा जाने र प्रहरीसम्बन्धी संघका ऐनहरूमा संशोधन, परिमार्जन गरेर प्रदेशमा पनि प्रहरी गठन हुने उनले बताए । 

गृहमन्त्री लेखकले वर्तमान सरकार काम गर्न आएकाले डलेभरीमा कुनै कमी नहुने दाबी गर्दै यो सरकार मुलुकमा शान्ति, सुव्यवस्था र विधिको शासन कायम गर्न सफल शुने दावी गरे । सरकारको स्थिरता, राजनीति स्थिरता, अर्थतन्त्रलाई क्रियाशील तथा आर्थिक गतिविधि बढाउन नयाँ सत्ता समीकरण गरिएको उनले बताए ।