बलम्बुको शंकास्पद वस्तु सेनाले डिस्पोज गर्यो, घोराहीमा सुतली बम पड्काउने दुई जना पक्राउ

६ भदौ, काठमाडौं । बिहीबार काठमाडौंको बलम्बु र दाङको घोराहीको महेन्द्र बहुमुखी क्याम्पसमा शंकास्पद बस्तु भेटिएका छन् । घोराहीमा सुतली बम राखिएको र त्यो विस्फोट भएको छ भने बम विस्फोट गराएको आरोपमा दुई जना विद्यार्थी पनि पक्राउ परेका छन् । 

काठमाडौंको चन्द्रागिरि नगरपालिका–१२, बलम्बु स्कुल नजिकैको एक घर अगाडि फेला परेको संकास्पद वस्तु रित्तो कुकर रहेको पाइएको छ । शंकास्पद वस्तु देखिएपछि स्थानीयले प्रहरीलाई खबर गरेका थिए । त्यसपछि नेपाली सेनाको बम डिस्पोज टोली गएर हेर्दा रित्ता कुकर फेला परेको जिल्ला प्रहरी परिसर ललितपुरका एसपी तथा प्रवक्ता नवराज अधिकारीले बताए । 

तर्साउन मात्रै राखिएको हरियो प्लाष्टिकभित्र कुकरको थोरै भाग बाहिर देखिएपछि स्थानीय त्रसित हुँदै प्रहरीलाई खबर गरेका थिए । शंकास्पद वस्तु नेपाली सेनाको बम डिस्पोजल टोलीले निष्क्रिय पारिसकेको छ । उक्त वस्तु बुधबार दिउँसो सवा बजेतिर २ जना व्यक्तिले राखेर गएको सीसीटीभी फुटेमा देखिएको छ । ती व्यक्तिको खोजी प्रहरीले सुरु गरेको छ । फुटेजमा उनीहरुको पहिचान हुन नसकेको प्रहरीको भनाइ छ ।

उता, दाङको घोराहीस्थित महेन्द्र बहुमुखी क्याम्पसमा सुतली बम विस्फोट भएको छ । बिहीबार बिहान ९ बजेतिर सुतली बम विस्फोट भएको प्रहरीले जनाएको छ । बम विस्फोट गराएको आरोपमा प्रहरीले सोही क्याम्पसमा पढ्ने दुई जना विद्यार्थीलाई पक्राउ गरेको छ । 

जिल्ला प्रहरी प्रमुख एसपी रामबहादुर केसीका अनुसार क्याम्पसकै विद्यार्थीहरू घोराही उपमहानगरपालिका वडा नम्बर १५ का अभियान थापा र सुभम कार्कीलाई पक्राउ गरि अनुसन्धान सुरु गरिएको छ । कक्षा १२ मा अध्यायनरत उनीहरुले रमाइलोका लागि सुतली बम विस्फोट गराएको बयान दिएका छन् ।